पुरानागाउँका वडाध्यक्ष र सचिवले रकम अनियमितता गरेको भन्दै प्रशासनमा उजुरी

मन्थली नगरपालिका– ९ पुरानागाउँका वडाध्यक्ष गोकर्णराज आरण र वडासचिव रमेश सुवेदीले किर्ते कागजात बनाई खेलकुदको रकम अनियमितता गरेकाले कारबाहीको माग गर्दै जिल्ला प्रशासन कार्यालय रामेछापमा उजुरी परेको छ।

वडाध्यक्ष आरण र सचिव सुवेदीले चालू आर्थिक वर्ष ०८१/८२ मा खेलकुद शीर्षकमा विनियोजन गरेको रकम वडामा कुनै पनि खेलकुदका कार्यक्रमहरू नै नगरी कार्यक्रम सम्पन्न भएको भन्दै किर्ते बिल भर्पाइ निर्माण गरी  एक लाख ५० हजार रुपैयाँ मन्थली नगरपालिकाबाट वडासचिव सुुवेदीले भुक्तानी लिएको भन्दै उजुरी परेको हो । 

वडाको खेलकुद क्षेत्रमा आएको उक्त रकमबाट एउटा पनि खेलकुदका कार्यक्रमहरू नै नगरी वडाध्यक्ष र सचिवले मनोमानी ढंगले कानुनविपरीत फर्जी बिल भर्पाइ निर्माण गरी रकम अपचलन गरेकाले आवश्यक कारबाहीको माग गर्दै आफुूले बाध्य भएर जिल्ला प्रशासन कार्यालयमा उजुरी दर्ता गर्नुपरेको पुरानागाउँ वडा खेलकुद विकास समितिका अध्यक्ष प्रकाश सोडारीले जानकारी दिए । 

उनले भने, ‘वडामा खेलकुदका लागि विनियोजन गरेको रकमले खेलकुदका कार्यक्रमहरू गर्नुपर्ने हो । खेलकुदको क्षेत्रमा आएको बजेटको विषयमा जानकारी नै नगर्ने र काम पनि नगरी फर्जी बिल भर्पाइ निर्माण गरी रकम अपचलन गर्दा पुरानागाउँका आमखेलकुदप्रेमी युवायुवती मारमा परेका छन् । खेल क्षेत्रमा लाग्नेहरूले वडामा कुनै पनि खेलकुदसम्बन्धी कार्यक्रम नहुँदा उनीहरूमा निराशा उत्पन्न भएको अध्यक्ष सोडारीले बताए। 

यस चालू आर्थिक वर्षमा पुरानागाउँ वडा कार्यालयले एक लाख ५० हजार रुपैयाँ नगरपालिकाबाट भुक्तानी लिएको मन्थली नगरपालिका– १० पुरानागाउँका वडासचिव रमेश सुवेदीले जानकारी दिए । उनले खेलकुद कार्यक्रम भएअनुसारको रकम नगरपालिकामा माग गरेको र सोहीअनुसार भुक्तानी आफूहरूले लिएको बताए । 

गएको आर्थिक वर्ष ०८०/८१ मा पनि पुरानागाउँका वडाध्यक्ष आरण र सचिवले खेलकुदका लागि विनियोजन भएको चार लाखमध्येबाट दुई लाख मन्थली नगर कप, एक लाख राष्ट्रपति रनिङ सिल्डमा खर्च गरेको र बाँकी एक लाख रुपैयाँ शीर्षक परिवर्तन गरी लैंगिक हिंसामा खर्च गर्ने गरी छुुट्याइएको थियो। विनियोजन गरेको रकम खर्च नभएपछि पुनः राज्यकोषमा नै फर्काइएको मन्थली नगरपालिका– १० पुरानागाउँका वडाध्यक्ष गोकर्णराज आरणले जानकारी दिए।

वडामा खेलकुदका लागि रकम बर्सेनि विनियोजन गरे तापनि खेलकुदका कुनै पनि कार्यक्रम नहुँदा आमखेलप्रेमीमा नैराश्यता छाएको छ। वडामा न त खेलकुदै मैदान नै छ। न कुनै खेलकुदका सामग्री नै खरिद हुन्छ । खेल क्षेत्रमा आएको बजेट बर्सेनि बन्दकोठामा कागजात निर्माण गर्ने र सक्ने गर्दा आफूहरूलाई दुःख लागेको खेलाडीहरू बताउँछन् ।