आज संघीय लोकतान्त्रिक मधेशी मोर्चा घोषणाको तयारी 

मधेशकेन्द्रित दलहरूले बिहीबार ‘संघीय लोकतान्त्रिक मधेशी मोर्चा’ घोषणा गर्ने अन्तिम तयारी गरेका छन् । मुलुकमा विकसित राजनीतिक घटनाक्रमसँगै संघीयता संकटमा पर्न लागेको भन्दै मधेशकेन्द्रित दलहरूले एकै ठाउँ उभिएर अलग्गै मोर्चा घोषणा गर्न लागेका हुन् ।

मोर्चाको अवधारणामाथिको छलफलमा आठ दल सहभागी हुँदै आए पनि बिहीबार बिहान बस्ने अन्तिम बैठकबाट मात्रै कति दल सहभागी हुन्छन् भन्ने अन्तिम टुंगो लाग्ने लोसपाका नेता लक्ष्मणलाल कर्णले बताए । बैठक बिहान ९ बजे सिंहदरबारस्थित उपेन्द्र यादव नेतृत्वको दल जसपा नेपालको कार्यालय सिंहदरबारमा बोलाइएको छ । 

‘अध्यक्षहरूको बैठकले मोर्चा गठनसम्बन्धी अवधारणापत्रलाई पारित गरेपछि कति दल सहभागी हुने टुंगो लाग्छ,’ कर्णले भने, ‘दिउँसो ३ बजे मोर्चाको घोषणा गर्ने गरी तयारी गरिएको छ ।’ अवधारणापत्र पारित भएमा काठमाडौं ब्यांक्वेटमा मोर्चा घोषणा हुने उनले बताए । मधेशकेन्द्रित दल धेरै टुक्रामा विभाजित हुँदा संघीयताको मुद्दा कमजोर बनेकाले एउटै पार्टी नबने पनि मोर्चामार्फत दबाबकारी भूमिका निर्वाह गर्न मोर्चा गठन गर्ने अन्तिम तयारी भएको उनको भनाइ छ । ‘धेरै टुक्रामा विभाजित हुँदा मधेशको मुद्दा कमजोर भयो, संघीयता मधेशले रगत बगाएर प्राप्त भयो, तर अहिले त्यही प्रणालीमाथि ठूलो आक्रमण भएकाले प्रदेशलाई अधिकारसम्पन्न बनाउनुपर्ने मागसहित सबै एक ठाउँ उभिन लागेका हौँ,’ कर्णले भने । 

मोर्चाको नेतृत्वमा जसपा नेपालका अध्यक्ष उपेन्द्र यादवलाई अघि सारिएपछि अशोक राई नेतृत्वको जसपा र डा. सिके राउत नेतृत्वको जनमत पार्टी मोर्चामा सहभागी हुन हच्किएको स्रोतले जनाएको छ ।