- वि.सं Invalid date format
भारत सरकारको अनुदान सहयोगअन्तर्गत नेपालमा शिक्षा, स्वास्थ्य र संस्कृति क्षेत्रमा कार्यान्वयन हुने १० वटा उच्च प्रभाव सामुदायिक विकास परियोजनाहरूको समझदारीपत्रमा हस्ताक्षर भएको छ। शिक्षा, स्वास्थ्य र संस्कृति क्षेत्रमा कुल ६२ करोड ५० लाख रुपैयाँका परियोजना सञ्चालन गर्ने समझदारीपत्रमा संघीय मामिला तथा सामान्य प्रशासन मन्त्रालय, नेपाल सरकारका परियोजना कार्यान्वयन एजेन्सीहरू र भारतीय दूतावासबlच समझदारीपत्रमा हस्ताक्षर भएको छ ।
यी परियोजनामध्ये ताप्लेजुङ मिक्वाखोला गाउँपालिकास्थित सान्बा माध्यमिक विद्यालयको निर्माण, सोलुखुम्बुको लिखु पिके गाउँपालिकास्थित न्गाग्युर न्यिङ्मा पल्युल ढोंगाग छोलिङ गुम्बाको निर्माण, चितवनको भरतपुर महानगरपालिकास्थित श्री राष्ट्रिय प्राथमिक विद्यालयमा नेपाल–भारत मैत्री ई पुस्तकालयको निर्माण, सिन्धुपाल्चोकको इन्द्रावती गाउँपालिका– ३ मा स्वास्थ्य चौकी भवनको निर्माण, इन्द्रावती गाउँपालिका– ६ मा स्वास्थ्य चौकी भवनको निर्माण, गुल्मीको धुर्कोट गाउँपालिकास्थित निन्युखर्क माध्यमिक विद्यालयको निर्माण, रुपन्देहीको बुटवल उपमहानगरपालिकास्थित नयाँगाउँ माध्यमिक विद्यालय भवनको निर्माण, हुम्लाको चंखेली गाउँपालिकामा नेपाल–भारत मैत्री अस्पतालको भवन निर्माणमा उक्त रकम खर्च हुनेछ ।
यसैगरी, कैलालीको धनगढी उपमहानगरपालिकास्थित सिद्धनाथ माध्यमिक विद्यालयको निर्माण, बझाङको जयपृथ्वी नगरपालिकास्थित श्री सत्यवादी माध्यमिक विद्यालयको प्रशासनिक तथा छात्रावास भवनको निर्माण गर्ने पनि समझदारीपत्रमा हस्ताक्षर भएको छ । नेपालमा यी परियोजनाहरू नेपाल सरकारका स्थानीय तहमार्फत कार्यान्वयन गरिने भारतीय राजदूतावासले जनाएको छ ।
दूतावासका अनुसार सन् २००३ यता भारतले यी १० वटा परियोजनासहित नेपालमा ५७३ भन्दा बढी परियोजनामा कार्य गरेको छ र नेपालका सातवटै प्रदेशका तल्लो तहमा शिक्षा, स्वास्थ्य, सडक तथा पुल, नदी तालिम, खानेपानी, विद्युतीकरण, सिँचाइ, संस्कृति, समाज कल्याण र अन्य सार्वजनिक उपयोगिताहरूको सिर्जनाका क्षेत्रमा ४९५ परियोजनाहरू पूरा गरेको छ । बाँकी परियोजनाहरू विभिन्न चरणहरूमा सञ्चालन भइरहेको छ ।
