अस्पतालको फार्मेसीमा औषधि नपाउँदा सेवाग्राही रित्तै फर्किेँदै 

वीरगन्जको नारायणी अस्पतालको फार्मेसीमा औषधि खरिद गर्न पुगेका सेवाग्राहीहरूले पर्याप्त औषधि नपाएको गुनासो गरेका छन् । स्वास्थ्य बिमा कार्यक्रममार्फत अस्पतालको फार्मेसीमा औषधि खरिद गर्न पुगेका सेवाग्राहीले आवश्यकताअनुसारको औषधि नपाएको गुनासो गरेका हुन् । अस्पतालको फार्मेसीमा सेवाग्राहीहरूले पर्याप्त औषधि नपाएपछि बाहिरको फार्मेसीमा औषधि खरिद गर्नुपर्ने बाध्यता रहेको अवस्था छ ।

अस्पतालको परिसरमा रहेको फार्मेसीमा उपलब्ध रहेको औषधि पनि सेवाग्राहीले नपाउने अधिकांश  सेवाग्राहीले गुनासो गरेका थिए । नारायणी अस्पतालमा चेकजाँच गराएर अस्पतालको फार्मेसीमा औषधि लिन पुग्दा पुर्जीमा लेखिएअनुसारको औषधि नपाएको बारा प्रसौनी गाउँपालिकाकी ७४ वर्षीया चम्पवा तेलिनले बताइन् । 

उनका अनुसार अस्पतालमा स्वास्थ्य बिमा गराएकाहरूले फार्मेसीमा नियमित रूपमा औषधि खरिद गर्न जाँदा पर्याप्त औषधि नपाएको अवस्था छ । 
उनले नारायणी अस्पतालका चिकित्सकले नौ प्रकारको औषधि लेख्दा सातवटा मात्र पाएको बताइन् । स्वास्थ्य बिमा हुदाँहुँदै पनि बाहिरको फार्मेसीमा औषधि खरिद गर्नुपर्ने बाध्यता रहेको सेवाग्राही तेलिनले दुःखेसो गरिन् ।

तेलिनजस्तै विन्दबासिनी गाउँपालिका– ५ हसवानिवासी ७३ वर्षीय रामलाल उपाध्यायले पनि चिकित्सकले लेखेअनुसारको औषधि नपाएको गुनासो गरे । 
पटकपटक नारायणी अस्पतालको फार्मेसीमा औषधि लिन आएको भए पनि चारवटा औषधिमा दुईवटा मात्र पाउने गरेको बताए । 
उनका अनुसार श्रीमान्–श्रीमती नै स्वास्थ्य बिमा कार्यक्रममार्फत गराएर आवश्यक औषधि नारायणी अस्पतालमा लिन पुग्दा पर्याप्त औषधि नपाउने गरेको उनको भनाइ छ ।  

नारायणी अस्पतालमा औषधि लिन पुग्दा चारप्रकारको औषधिमध्ये दुईवटा मात्र पाउने गरेको अर्की सेवाग्राही ७१ वर्षीय दीपराजी देवीले गुनासो गरिन् ।