चैत्राष्टमी मेला आजदेखि सुरु 

बागलुङ कालिका भगवती मन्दिरपरिसरमा बुधबारदेखि चैत्राष्टमी मेला सुरु हुँदै छ। हरेक वर्षजस्तै यस वर्ष पनि चैतेदसैँको अवसरमा मेलाको आयोजना गरिएको हो । यस वर्ष गुठी संस्थानको आयोजनामा धार्मिक सम्मेलनसमेत हुने बताइएको छ। यस वर्षको चैत्राष्टमी मेला चैत २० गतेदेखि २५ सम्म आयोजना गर्न थालिएको बागलुङ कालिका भगवती गुठी व्यवस्थापन समितिका अध्यक्ष कुमार खड्काले जानकारी दिए। चैतेदसैँका अवसमा कालिका भगवती मन्दिर दर्शनका लागि लाखौँ दर्शनार्थी आउने गरेका छन्।

पर्यटन प्रवर्द्धन, संस्कृतिको संरक्षण, स्थानीय उत्पादनको प्रचारप्रसार र परम्पराको निरन्तरता दिने उद्देश्यले मेला आयोजना गरिँदै आएको गुठी व्यवस्थापन समितिका अध्यक्ष खड्काले जानकारी दिए। पछिल्ला वर्षहरूमा विभिन्न ठाउँहरूमा व्यापारिक मेलाहरू आयोजना हुने गरेको भए पनि नेपालकै प्राचीन मेला मानिएको यो मेलाको आफ्नै महत्त्व र इतिहास रहेको पाका पुरानाहरू बताउँछन्।

चैतेदसैँ मेलामा घरायसी प्रायोजनका सामग्रीहरू डाला, नाङ्ला, ठेका, हातहतियारलगायतका वस्तुहरूको परापूर्वकालदेखि नै किनमेल हुने गरेको छ। चैतेदसैँमा बागलुङ कालिका मन्दिरमा टाढा–टाढाका जिल्ला र भारतबाट समेत भक्तजनहरूको आगमन हुने गरेको छ।

मेलामा पालिकास्तरीय पुरुष भलिबलको विजेतालाई नगद दुई लाख ट्रफी, मेडल र प्रमाणपत्र, द्वितीय हुनेलाई नगद एक लाख ट्रफी, मेडल र प्रमाणपत्र, सेमिफाइनल पुग्ने समूहलाई नगद २५ हजारसहित मेडल र प्रमाणपत्र तथा उत्कृष्ट खेलाडीलाई नगद पाँच हजार, ट्रफी र प्रमाणपत्र प्रदान गरिने भएको छ । त्यसैगरी, खुला महिला भलिबल प्रतियोगिता, छेलो प्रतियोगिता र दोहोरी गीत प्रतियोगितासमेत आयोजना गरिएको कालिका भगवती गुठी व्यवस्थापन समितिका उपाध्यक्ष निशान खडकाले जानकारी दिए । मेलामा राष्ट्रिय कलाकारहरूको प्रस्तुति रहनेछ । मेलाको उद्घाटन गण्डकी प्रदेश सरकारका मुख्यमन्त्री सुरेन्द्रराज  पाण्डेले गर्नेछन् ।