तेस्रो नेपाल सुपर लिग : दुईपटकको उपविजेता  धनगढीको सानदार जित

लगातार दुई सिजनको साबिक उपविजेता धनगढी एफसीले मंगलबार दशरथ रंगशालामा आयोजित तेस्रो नेपाल सुपर लिग (एनएसएल)मा सानदार जित निकालेको छ । धनगढीले बुटवल–लुम्बिनी एफसीलाई ४–१ ले हराएको हो । धनगढीको जितमा अहमद हिजाजीले दुई गोल गरेका थिए । कृतिशरत्न छुन्जु र सर्जियो बार्बोजाले समान एक गोल गरे । पहिलो खेलमै धनगढीले महत्वपूर्ण तीन अंक बटुल्यो । बुटवलले दोस्रो खेलमा जित निकाल्न सकेन । बुटवलले दुई खेलबाट एक अंक जोडेको छ । यसअघि बुटवलले झापा एफसीसँग गोलरहित बराबरी खेलेको थियो ।

प्रतियोगिताअन्तर्गत बुधबार साबिक विजेता ललितपुर सिटी एफसीले पोखरा थन्डर्सविरुद्ध प्रतिस्पर्धा गर्नेछ । लिगमा दुवै टोली जितविहीन छन् । बुटवलविरुद्ध धनगढीले खेल नियन्त्रणमा राखे पनि अन्तिम इन्जुरी समयमा दुई गोल गर्दै जित पक्का गरेको थियो । खेलको छैटौँ मिनेटमा बुटबल सम्हालिन नपाउँदै धनगढीले १–० को अग्रता लियो । धनगढीका हिजाजीले डिबक्सभित्र उत्कृष्ट रूपमा एक्रोबेटिक गोल गरेका थिए । उनले स्ट्राइकर जर्ज प्रिन्स कार्कीको हेडिङ पासमा गोल गरेका हुन् । 

बुटवलले भने बराबरी गोलको मौका खोजिरहेको थियो । एक गोलले पछाडि रहँदा बुटवलले खेलमा सुधार गरी विपक्षीमाथि दबाब बनाएको थियो । खेलको ३१औँ मिनेटमा बुटवलले १–१ को बराबरी गोल फर्कायो । जापानिज खेलाडी केन्टा हाराले धनगढीविरुद्ध आकर्षक गोल गरे । उनको गोलसँगै बुटबलले मध्यान्तरअघि नै धनगढीलाई १–१ को बराबरीमा रोक्यो । केन्टाले मनीष डाँगीको कर्नरमा पेनाल्टी क्षेत्रमा गोल गरेका हुन् । 

केन्टाको बराबरी गोलअघि धनगढीले राम्रो गोल अवसर चुकाएको थियो । खेलको दसौँ मिनेटमा धनगढीका कृतिशरत्नको सटिक प्रहार बारनजिक हुँदै बाहिरिएको थियो । खेलको २७औँ मिनेटमा हिजाजीको प्रहार क्रसबारमा लाग्दा धनगढीले दोहोरो अग्रता लिने अवसर खेर फाल्यो । बुटबलले बराबरी गोल फर्काएपछि अग्रता लिने मौका गुमाएको थियो । खेलको ३८औँ मिनेटमा बुटवलका फत्तेमान घलेले डिबक्सबाट प्रहार गरेको बललाई धनगढीका गोलरक्षक वाइद विरोले उत्कृष्ट बचाउ गरेका थिए । 

दोस्रो हाफमा धनगढीको तीन गोल
दोस्रो हाफमा बुटवलको प्रदर्शन कमजोर रह्यो । मध्यान्तरअघि जस्तो खेल देखाउन नसक्दा बुटवलले दोस्रो हाफमा प्राप्त अवसर खेर फाल्यो । दोस्रो हाफमा धनगढीले सुरुदेखि बुटवलमाथि दबाब बनाएको थियो । खेलको ७५औँ मिनेटमा धनगढी २–१ ले अघि रह्यो । धनगढीका मार्की खेलाडीसमेत रहेका कृतिशरत्नले एकल प्रयासमा टोलीलाई अग्रता दिलाए । उनले गोल गर्ने क्रममा बुटवलका डिफेन्डर र गोलरक्षकलाई छकाएका थिए । यसअघि खेलको ५०औँ मिनेटमा धनगढीका हिजाजीको हेडिङ गोल प्रयास क्रसबारमा लागेको थियो । खेलको ७३औँ मिनेटमा बुटवलका सुमित मल्लको पासमा मनीष सेढाईंको प्रहार पनि क्रसबारमै लाग्यो ।  

प्रतिस्पर्धाको इन्जुरी समयमा नाटकीय मोड लियो । धनगढीले इन्जुरी समयमा प्राप्त दुवै अवसरमा गोल गरी बुटवललाई ४–१ ले निराश बनायो । इन्जुरी समयको पाँचौँ मिनेटमा हिजाजीले सहजै धनगढीलाई ३–१ को अग्रता दिलाए । यिनले मोहमदको लामो पासमा गोल गरेका हुन् । इन्जुरी समयको नवौँ मिनेटमा सर्जियोले रिवाउन्डमा धनगढीको जित ४–१ ले पक्का पारे । सर्जियोले गोल गर्नुअघि प्रिन्सको प्रहारलाई गोलरक्षकले बचाए पनि बल रिबाउन्ड भएको थियो । जसलाई सर्जियोले सहजै गोलको दिशा दिए । 

हामीले राम्रो खेल्यौँ : जुआन मानुयल, प्रशिक्षक, धनगढी
हामीले राम्रो खेल्यौँ । केही समयमा डिफेन्समा कमजोरी भयो । हामी योजनाअनुसार मैदानमा गयौँ । खेलमा गल्ती गर्नुहुँदैन । बुटवलमाथि नियन्त्रण बनायो । एकआपसमा आत्मविश्वास बनायौँ । हाम्रो लक्ष्य नै जित्ने थियो । तीन अंकको पहिलो प्राथमिकता हो । जब खेलाडी गोल गर्छन् । उनीहरू खुसीमा मस्त हुन्छन् । सबै गोल उत्कृष्ट थियो । फुटबल हेर्न रंगशालामा दर्शक आउनुपर्छ । लिग उत्कृष्ट छ ।