एनपिएलको अनियमितताबारे १५ दिनभित्र प्रतिवेदन बुझाउन निर्देशन 

• एनपिएलको आयोजक क्यानले अवैध रूपमा विदेशी कम्पनी ल्याउनेदेखि अपारदर्शी कारोबार गरेको भन्दै राखेपले गर्‍यो तीन सदस्यीय छानबिन समिति गठन

राष्ट्रिय खेलकुद परिषद् (राखेप)ले नेपाल प्रिमियर लिग (एनपिएल)मा भएको अनियमितता छानबिन गर्न समिति गठन गरेको छ । राखेपका सदस्यसमेत रहेका अञ्जन धमलाको संयोजकत्वमा बुधबार तीन सदस्यीय समिति गठन गरिएको हो । सदस्यमा सारंगी निरौला र कमला दाहाल रहेका छन् । सदस्यसचिवस्तरीय निर्णयअनुसारै समितिलाई १५ दिनभित्र एनपिएलमा भएको अनियमितताबारे प्रतिवेदन बुझाउन निर्देशन दिइएको हो । 

‘क्यानले एनपिएल आयोजनाका क्रममा राष्ट्रिय खेलकुद विकास ऐन तथा विज्ञापन नियमन ऐन र अन्य प्रचलित कानुन उल्लंघन गर्दै अनियमितता गरेको आरोपमा छानबिनका लागि कार्यदल गठन गरिएको छ,’ राखेपको खेलकुद विभागका निमित्त विभागीय प्रमुख प्रभा कर्माचार्यले बुधबार जारी गरेको पत्रमा भनिएको छ । 

क्यानले एनपिएलमा अवैध रूपमा विदेशी कम्पनी ल्याउनेदेखि अपारदर्शी कारोबार गरेको भनी युवा तथा खेलकुद मन्त्रालय, राखेप तथा अख्तियार दुरुपयोग अनुसन्धान आयोगमा उजुरी परेको पत्रमा उल्लेख छ । उजुरीका आधारमा अख्तियारले सुरुमा खेलकुद मन्त्रालयलाई छानबिन गर्न निर्देशन दियो । त्यसपछि मन्त्रालयले राखेपलाई छानबिन गरी सत्यतथ्यको प्रतिवेदन बुझाउन निर्देशन दिएको हो । मन्त्रालयको निर्देशनअनुसार परिषद्ले सदस्यसचिव टंकलाल घिसिङस्तरीय निर्णयबाट १५ दिनभित्र छानबिन गरी प्रतिवेदन बुझाउने म्यान्डेटसहित गत १३ चैतमा तीन सदस्यीय कार्यदल गठन गरेको हो । 

पहिलो संस्करणको एनपिएल गत १५ मंसिरदेखि ६ पुससम्म भएको थियो । जसमा जनकपुर बोल्ट्सले धनगढीलाई हराउँदै उपाधि हात पारेको थियो । क्यानले ब्रोडकास्टिङ पार्टनरका रूपमा एनपिएलका सबै खेल स्टार स्पोर्टस्लाई प्रत्यक्ष प्रसारण गर्न दिएको थियो । स्टार स्पोर्टस् भित्र्याउने क्रममा क्यानले नेपालका सञ्चारमाध्यमलाई प्रतिस्पर्धाको अवसरसमेत नदिएको भन्दै क्यान नेतृत्वको आलोचना भएको थियो । 

सार्वजनिक ऐनविपरीत
क्यानले स्टार स्पोर्टस्लाई ब्रोडकास्टिङ पार्टनर बनाउनु सार्वजनिक ऐनविपरीत भएको राखेपले जनाएको छ । ‘क्यानले सार्वजनिक खरिद ऐनविपरीत हुने गीर भ्रामक सूचना जारी गर्दै नेपाली मिडिया तथा विज्ञापन उद्योगको स्रोत र क्षमताको अवमूल्यन गरेको, प्रचलित अन्य कानुनहरूको अलावा विज्ञापन नियमन गर्ने ऐन, २०७६ को दफा ६ को उल्लंघन गरेको, नेपालमा विज्ञापन व्यवसाय गर्नका लागि विज्ञापन बोर्डमा दर्ता हुन विदेशी टेलिभिजन च्यानलको सदस्यता लिनुपर्ने बाध्यात्मक परिस्थिति सिर्जना गरेको, राष्ट्रिय खेलकुद विकास ऐन, २०७७ को दफा ४४ को उपदफा २ बमोजिम राष्ट्रिय खेल संघ वा प्रदेश र स्थानीयस्तरका खेलसम्बन्धी संस्था वा निकाय तथा संघले विदेशी सरकार, अन्तर्राष्ट्रिय रूपमा प्रतिष्ठा कमाएका अन्य अन्तर्राष्ट्रिय च्यानललाई मौका नदिई सार्वजनिक खरिद ऐनविपरीत विनाटेन्डर स्टार स्पोर्टस्लाई दियो,’ राखेपको पत्रमा भनिएको छ । समितिलाई प्रचलित कानुनका आधारमा सरोकारवाला सबै पक्षसँग छलफल तथा आवश्यक कागजात अध्ययन गरेर निर्धारित समयभित्र विवरण तथा प्रतिवेदन तयार गर्ने सीमा दिइएको छ । यसैबिच क्यानका प्रवक्ता छुम्बी लामाले राखेपले गठन गरेको समितिबारे आधिकारिक रूपमा आफूहरूलाई जानकारी नभएको बताएका छन् । ‘अहिलेसम्म यस्तो केही पनि जानकारी छैन, यदि यस्तै समिति गठन भएको छ भने क्यानले पूर्ण रूपमा छानबिनमा सहयोग गर्नेछ,’ लामाले भने । 

फेरि क्रिकेटलाई पुरानै अवस्थामा लैजाने चलखेल भयो : छुम्बी लामा, प्रवक्ता, क्यान 
पछिल्लो समयमा नेपालको क्रिकेटले राष्ट्रिय तथा अन्तर्राष्ट्रिय क्षेत्रमा सफलता हात पारिरहेको छ । पहिलोपटक आयोजना भएको नेपाल प्रिमियर लिगले एक किसिमले देशको मुहार फेर्ने काम गरेको थियो । यसले अन्तर्राष्ट्रिय क्षेत्रमा नेपालको क्रिकेटलाई एउटा उचाइमा पुर्‍याएको थियो । अहिले क्रिकेट राम्रो भइरहँदा यसलाई पुरानै अवस्थामा पुर्‍याउने पक्षहरू पनि उत्तिकै सक्रिय छन् । जहाँसम्म लिगकै सम्बन्धमा राष्ट्रिय खेलकुद परिषद्ले जुन कार्यदल बनाएको भन्ने सुनिएको छ । त्यसबारेमा अहिलेसम्म आधिकारिक रूपमा क्यानलाई जानकारी छैन । तर, यस सम्बन्धमा क्यानले राखेपलाई अनुसन्धानमा पूर्ण सहयोग गर्नेछ ।