- वि.सं २o८१ चैत २१ बिहीबार
थाइल्यान्डको औपचारिक भ्रमणमा रहेका प्रधानमन्त्री केपी ओलीले बैंककमा थाइल्यान्डका वरिष्ठ व्यवसायीहरूसँग भेटवार्ता गरेका छन्। भेटका अवसरमा नेपाली व्यवसायी प्रतिनिधिमण्डलका सदस्यहरू पनि सहभागी रहेकाे प्रधानमन्त्रीकाे सचिवालयले जनाएकाे छ।
यसैगरी प्रधानमन्त्री ओली र थाइल्यान्डका समकक्षी पे थोङथान सिनावात्राबिच बुधबार सरकारी भवनमा द्विपक्षीय औपचारिक वार्ता भएको छ । वार्तापछि सरकारी दुई र विभिन्न ६ क्षेत्रमा दुई देशबिच सम्झौतापत्रमा हस्ताक्षर भएको छ ।
बहुपक्षीय प्राविधिक तथा आर्थिक सहयोगका लागि बंगालको खाडी प्रयास (बिमस्टेक)को छैटौँ शिखर सम्मेलनका क्रममा बुधबार थाइल्यान्डमा दुई देशबिच सरकारी दुईवटा र गैरसरकारी क्षेत्रका ६ वटा सम्झौतापत्रमा हस्ताक्षर भएको हो ।
यस्तै, प्रधानमन्त्री केपी ओली र भारतीय प्रधानमन्त्री नरेन्द्र मोदीबिच शुक्रबार अपराह्न थाइल्यान्डको राजधानी बैंककमा भेटवार्ता तय भएको छ । ओली पछिल्लोपटक प्रधानमन्त्री भएपछि भारतीय प्रधानमन्त्री मोदीसँग हुन लागेको यो दोस्रो भेट हो । उनीहरूबिच पहिलो भेट अमेरिकाको न्युयोर्कमा भएको थियो । भारत भ्रमणमा जाने प्रधानमन्त्री ओलीको प्रयास भने नौ महिनासम्म सफल भएको छैन ।
शुक्रबार बिमस्टेक शिखर सम्मेलन
शुक्रबार बिमेस्टकको छैटौँ शिखर सम्मेलन हुँदै छ । प्रधानमन्त्री ओलीसहित शीर्ष नेताहरूले शुक्रबार नै सम्बोधन गर्ने कार्यक्रम छ । बिमस्टेक नेताहरूबिच बिहीबार मेरिटाइम ट्रान्सपोर्ट कोअपरेसन अग्रिमेन्टमा हस्ताक्षर छ । बिमस्टेक सचिवालयका अनुसार सम्मेलनले घोषणापत्र अनुमोदन गर्ने नियमित कार्यबाहेक महत्त्वपूर्ण सम्झौतामा हस्ताक्षर गर्नेछ र सहमति अनुमोदन गर्नेछ ।
बिमस्टेक बैंकक भिजन २०३० अनुमोदन, बिमस्टेक संयन्त्रहरूका लागि कार्यविधि नियमहरूको अनुमोदन, बिमस्टेकको भविष्यका लागि प्रबुद्ध व्यक्ति समूह (इपिजी)को प्रतिवेदन अनुमोदन हुनेछ । यसैगरी, बिमस्टेक र हिन्द महासागर रिम संघबिच समझदारीपत्रमा हस्ताक्षर तथा संयुक्त राष्ट्रसंघको लागुऔषध तथा अपराध कार्यालयसँग सम्झौता गर्ने पनि बिमस्टेक सम्मेलनको कार्यसूची छ ।
