लेस्टरलाई १९ मिलियन पाउन्ड घाटा

युरोपियन क्लबहरूले च्याम्पियन्स लिगमा स्थान बनाउँदा ठूलो सफलता मान्छन् । च्याम्पियन्स लिग खेल्न त्यति सहज छैन । छनोट भएदेखि क्लबहरूको आर्थिक भार बिस्तारै बढ्दै जान्छ । च्याम्पियन्स लिग जित्ने हरेक युरोपियन क्लबको सपना हुन्छ । त्यसका लागि क्लबहरूले लगानी थपिरहेका हुन्छन् ।

आर्थिक भार वहन गर्न नसक्ने क्लब सिजन समाप्तिसम्म चर्को घाटा व्यहोर्न बाध्य हुन्छ । अहिले बेलायती मिडियाले इंग्लिस क्लबमध्ये लेस्टरले आर्थिक संकटको सामना गरेको खुलासा गरेका छन् । २०२३/०२४ को सिजनमा उसले १९.४ मिलियन पाउन्ड घाटा व्यहोरेको थियो । 

इंग्लिस प्रिमियर लिगमा पिएसआर नीति छ । यस नीतिअनुसार क्लबहरूले घाटा नहुने गरी सहभागिता जनाउने हो । तर, लेस्टरको हकमा यो लागू भएन । उसले इंग्लिस प्रिमियर लिगमा नसोचेको आर्थिक भार बोक्यो । २०२१/२२ मा ८९.२ मिलियन पाउन्ड र २०२२/०२३ को सिजनमा इपिएल तयारीका लागि ८९.७ मिलियन पाउन्ड खर्चेको थियो ।  

लेस्टरले इंग्लिस प्रिमियर लिगको व्यवस्थापनसँग आर्थिक पक्षमा छलफल गरेको छ । यद्यपि, व्यवस्थापनले लेस्टरको मागमाथि सुनवाइ गरेको छैन । ‘च्याम्पियन्स लिग खेल्दा आर्थिक पक्ष बलियो हुन्छ, तर हामीले धेरै घाटा खाएका छौँ,’ लेस्टरले जारी गरेको विज्ञप्तिमा भनिएको छ । पछिल्ला सिजनमा प्रिमियर लिगमा उत्कृष्ट प्रदर्शन गरेको लेस्टर रेलिगेसन जोनमा छ । लिगको २९ खेल समाप्तिसम्म १९औँ स्थानमा छ । १७औँ स्थानमा रहेको वल्भह्याम्टन भन्दा १२ अंकले पछाडि छ ।