- वि.सं २o८१ चैत १९ मंगलबार
रसुवामा निर्माणाधीन दुई सय १६ मेगावाटको माथिल्लो त्रिशूली–१ जलविद्युत् आयोजनाले प्रभावित आमाछोदिङ्मो गाउँपालिकालाई एम्बुलेन्स प्रदान गरेको छ । विपत्, दुर्घटना एवं गम्भीर प्रकृतिका रोगबाट प्रभावित घाइते, सुत्केरीलगायत आयोजना प्रभावित क्षेत्रका बासिन्दाका लागि एम्बुलेन्स प्रदान गरिएको हो ।
आयोजनाको सामुदायिक सहयोग कार्यक्रमअन्तर्गत प्रदान गरिएको एम्बुलेन्स आयोजना प्रभावित आमाछोदिङ्मो गाउँपालिका–१ हाकुस्थित हाकु हेल्थपोस्टले सञ्चालन गर्नेछ । आयोजना प्रभावित अर्को उत्तरगया गाउँपालिकालाई पनि छिट्टै एम्बुलेन्स प्रदान गर्ने तयारी गरेको छ ।
आयोजनाको प्रवद्र्धक नेपाल वाटर एन्ड इनर्जी डेभलपमेन्ट कम्पनी प्रालिका प्रमुख कार्यकारी अधिकृत (सिइओ) बायोङ सु मिनले सोमबार हाकुमा आयोजित कार्यक्रमबिच एम्बुलेन्सको चाबी गाउँपालिकाका अध्यक्ष बुचुङ तामाङलाई हस्तान्तरण गरेका हुन् । सिइओ बायोङ सु मिनले बिरामी र दुर्घटनाका घाइतेलाई अस्पताल पुर्याउनुभन्दा अगावै आकस्मिक स्वास्थ्य सेवा उपलब्ध गराउन एम्बुलेन्स गाउँपालिकालाई प्रदान गरिएको बताए ।
