- वि.सं २o८१ माघ ६ आइतबार
बुटवलस्थित सुप्रिम बचत तथा ऋण सहकारी संस्था लिमिटेडको रकम अपचलन प्रकरणका आरोपीविरुद्धको मुद्दा दर्ता प्रक्रियामा ढिलाइ भएको छ । आइतबार मुद्दा दर्ताको सम्भावना कम रहेको छ । जिल्ला सरकारी वकिलको कार्यालयबाट जिल्ला अदालतमा पठाएको फाइल रुजु गर्न ढिलाइ हुँदा मुद्दा दर्ता गर्ने समय लम्बिँदै गएको छ ।
इलाका प्रहरी कार्यालय बुटवलले राष्ट्रिय स्वतन्त्र पार्टीका सभापति रवि लामिछानेसहित ४२ जनासँग एक अर्ब १२ करोड बिगो दाबीसहित गत माघ २६ गते जिल्ला सरकारी वकिल कार्यालयलाई अनुसन्धान प्रतिवेदन बुझाएको थियो ।
यसअघि प्रहरीले २८ जनाविरुद्ध सहकारी ठगी मुद्दा दर्ता गरेकोमा उनीहरूमध्ये १७ जनाले संगठित रूपमा सहकारी ठगी गरेको अनुसन्धान प्रतिवेदनमा भेटिएकाले २८ जनामध्येबाट १७ जनाविरुद्ध संगठित सहकारी ठगी मुद्दा दर्ताका लागि बिहीबार जिल्ला अदालत पठाइएको जिल्ला न्यायाधिवक्ता प्रेमराज पौडेलले बताए । १७ जनाविरुद्ध मुद्दा दर्ताका लागि सरकारी वकिलको कार्यालयले बिहीबार फाइल पठाए पनि आइतबारसम्म दर्ता हुन सकेको छैन ।
जिल्ला सरकारी वकिलको कार्यालयले रवि लामिछानेसहित पूरक मुद्दाका १४ र पुरानो २८ जनामध्येबाट आठजना गरी २२ जनालाई संगठित सहकारी ठगीमा मुद्दा दर्ताका लागि जिल्ला अदालतमा फाइल पठाएको छ । आइतबार मुद्दाका लागि सरकारी वकिलको कार्यालयले २२ जनाबाट ५५ करोड २२ लाख रुपैयाँ बिगो माग दाबी गरेको जिल्ला न्यायाधिवक्ता प्रेमराज पौडेलले बताए ।
मुद्दाको फाइल रुजु गर्ने प्रक्रियामा रहेकाले मुद्दा दर्तामा ढिलाइ भएको जिल्ला अदालत स्राेतले बताएको छ । यसअघिको २८ र अहिलेको पूरक जाहेरी रवि र छविसहित थप १४ जना गरी ४२ जनालाई सुप्रिम बचत तथा ऋण सहकारी संस्था लिमिटेडको रकम अपचलन गरेको अभियोगमा मुद्दा चलाउन रायसहितको प्रतिवेदन जिल्ला सरकारी वकिलकोमा बुझाइएको इलाका प्रहरी कार्यालय बुटवलले प्रतिवेदन बुझाएको थियो ।
प्रहरीले बुझाएको प्रतिवेदनमा रवि लामिछानेलाई चार करोड १३ लाख र छविलाल जोशीलाई चार करोड २८ लाख रुपैयाँ बिगो मागदाबी गरिएको छ । प्रहरीले यसअघि गितेन्द्रबाबु राईसहितका २८ जनाविरुद्ध मुद्दा दर्ता गरिसकेको छ ।
असोज ५ गते राष्ट्र्रिय स्वतन्त्र पार्टीका सभापति रवि लामिछानेसहित थप १४ विरुद्ध किटानी जाहेरी परेपछि प्रहरीले थप पूरक प्रतिवेदन बनाएको थियो । सुप्रिम सहकारीबाट लामिछानेले व्यक्तिगत दुई करोड रुपैयाँ ऋण लिएको प्रतिवेदनमा उल्लेख छ । त्यसैगरी, सामूहिक दायित्वमा रहने गरी दुई करोड १३ लाख ऋण लिएको प्रहरी स्राेतको भनाइ छ ।
त्यसैगरी, छविलाल जोशीले दुई करोड ५० लाख व्यक्तिगत र एक करोड ७८ लाख सामूहिक दायित्व हुने गरी चार करोड २८ लाख अपचलन गरेको प्रहरी प्रतिवेदनमा उल्लेख रहेको स्राेतको भनाइ छ । रविले लिएको भनिएको रकम सुप्रिमकी कर्मचारी रोशनी गुरुङले लामिछानेका नाममा ग्लोबल आइएमई बैंकको खातामा ०७७ चैत १८ गते चार लाख सेवाशुल्क कटाएर एक करोड ९६ लाख रुपैयाँ जम्मा गरेकी थिइन् ।
