१२० भूकम्पपीडित परिवार घरबाहिर, त्रिपाल र कम्बल ५९–५९ थान मात्रै वितरण

बाजुराको जगन्नाथ गाउँपालिका– ५, गोत्रीलाई केन्द्रविन्दु बनाएर शुक्रबार बिहान ४ः१४ बजे गएको ५.२ रेक्टर स्केलको भूकम्पले घर भत्काउँदा १२० परिवार घरबाहिर छन् । तर, भूकम्पको दुई दिनसम्म खानेकुरा उपलब्ध नगराएको राज्यले सबै पीडित परिवारलाई एक–एक थान त्रिपाल र कम्बल पनि दिन सकेको छैन ।

आइतबार जिल्ला प्रशासन कार्यालयले ५०–५० थान तथा जिल्ला रेडक्रस शाखाले नौ–नौ थान त्रिपाल र कम्बल मात्रै उपलब्ध गराएका छन् । जब कि वडा कार्यालयले सार्वजनिक गरेको सूचीअनुसार बिहारडाँडामा ३७, दर्जीटोलमा २५, बामनज्युलामा २०, तल्लो गोत्रीमा १८, माथिल्लो गोत्रीमा ११, खैरेनी झारघटमा आठ र पारिगाउँमा एउटा घर जोखिमपूर्ण अवस्थामा छन् । माटो र ढुंगाबाट बनेका घरहरू कतिपयको गाह्रो खसेको, कतिपयको गाह्रो चिराचिरा परेको तथा कतिपयको छानोसहित खसेको अवस्था छ । जोखिमपूर्ण घरबाट परिवारहरू बारीमा विस्थापित भएका छन् ।

गाउँपालिका अध्यक्ष कालीबहादुर शाहीले जिल्ला प्रशासन कार्यालयबाट ५० थान त्रिपाल र ५० थान कम्बल पालिकामा प्राप्त भएको बताए । साँझ ५ः३० तिर मात्रै त्रिपाल र कम्बल आइपुगेकोमा भूकम्पपीडितहरूलाई बाँड्न थालिएको उनले बताए ।

त्यस्तै, जिल्ला रेडक्रस शाखाका मन्त्री टंकप्रसाद न्यौपानेसहितको टोली बस्तीमै पुगेर केही पीडितहरूलाई सीधै नौ–नौ थान त्रिपाल र कम्बल बाँडेको छ । दर्जीटोलका मुगा दमाईं, पातु दमाईं, अनुराम दमाईं, अवि दमाईं, गोपी दमाईंलगायतलाई अपराह्न ४ बजेतिर त्रिपाल र कम्बल बाँडेको न्यौपानेले बताए । मुगा १३ दिनकी सुत्केरी हुन् भने पातुका दुई वर्षका छोरा छन् ।

बाँकी पीडितका लागि दातृ निकायबाट सहयोग माग गरिएको सहायक प्रमुख जिल्ला अधिकारी रूपक मण्डलले बताए । ‘जिल्ला प्रशासन र रेडक्रसबाट गरेर ५९–५९ थान त्रिपाल र कम्बल पु¥याइएको छ । बाँकी पीडित परिवारका लागि विभिन्न सहयोगी संस्थाहरूसँग माग गरेका छौँ, छिट्टै उपलब्ध होला,’ उनले भने ।

एउटा कम्बल र त्रिपाल पाएका परिवारलाई पनि त्यसले पुग्ने अवस्था छैन । ‘हामी श्रीमान्–श्रीमतीसहित पाँच सन्तान छन् । सातजनाको परिवारलाई एउटा त्रिपालले शीत त ओत्ला, तर एउटा कम्बल सातजनाले कसरी ओढ्ने ?’ उनले भने, ‘भएको अन्नपात पनि भत्किएका संरचनाले घरभित्रै च्यापिएको छ । खानेकुरा केही छैन । खाद्यान्न कहिले पाइन्छ, थाहा छैन ।’ 

जोखिमपूर्ण घरमै छिरेर पीडितहरूले निकाल्न थाले अन्न र लत्ताकपडा
एक रात थोत्रा त्रिपाल र खुला आकाशमुनि बिताएका बाजुराका भूकम्पपीडितलाई दोस्रो दिन पनि राज्यले आवश्यक त्रिपाल, लत्ताकपडा र खाद्यान्न उपलब्ध गराएन । १२० परिवार विस्थापित भएकामा राज्यबाट जम्मा ५९–५९ थान त्रिपाल र कम्बल मात्रै पीडित बस्तीमा पुगेको छ । खाद्यान्न त झन् दिएकै छैन ।

चिसोबाट बच्न र भोक मेट्न पीडितहरूले जोखिमपूर्ण घरमै छिरेर अन्न र लत्ताकपडा झिक्न थालेका छन् । दर्जीटोलका जस दमाईंले डरैडरमा घरभित्र छिरेर लत्ताकपडा र अन्नहरू निकालेको बताए । उनले भने, ‘राज्यको राहत केही भेटिएको छैन । घरभित्र बस्ने अवस्था पनि छैन । चिसो र भोकले मर्नुपर्ने अवस्था निम्तिएपछि चिराचिरा परेको जोखिमपूर्ण घरभित्र छिरेर हतारहतार लत्ताकपडा र अन्नपात झिकेका छौँ । त्यही खान थालेका छौँ ।’

दुई परिवारलाई गाउँपालिका अध्यक्षले दिए पाँच हजार
मुगा र पातुका परिवारलाई पालिका अध्यक्ष कालीबहादुर शाहीले व्यक्तिगत सहयोगस्वरूप पाँच हजार रुपैयाँ दिएका छन् । साना बालबच्चा भएकाले उनीहरूलाई खाद्यान्न किनमेलका लागि सहयोग गरेको शाहीले बताए । आइतबार बस्ने भनिएको पालिकास्तरीय विपत् व्यवस्थापन समितिको बैठक भने बस्न सकेन । अब सोमबार बिहान बस्ने अध्यक्ष शाहीले बताए । कुन वडामा कति पूर्ण र आंशिक क्षति छ भन्ने पूरा विवरण संकलन गरेपछि बैठकबाट पालिकाले आवश्यक सहयोग घोषणा गर्ने उनले बताए ।