- वि.सं २o८१ पौष ७ आइतबार
एमालेनिकट विद्यार्थी संगठन अनेरास्ववियुले कार्यालय घेराउसँगै अवरोध गरेपछि त्रिविका उपकुलपति प्रा.डा. केशरजंग बराल कार्यालय जानै छाडेका छन् । ३५ सूत्रीय माग राख्दै अनेरास्ववियुले अवरोध गरेपछि २६ मंसिरदेखि बराल कार्यालय जान छाडेका हुन् ।
बरालले आफ्नो कार्यालयअगाडि विद्यार्थीले घेराउ गरेपछि अन्य पदाधिकारी तथा त्रिवि कन्ट्रोलरको कार्यकक्षमा बसेर काम गर्ने गरेका छन् भने कहिलेकाहीँ घरबाटै पनि काम गर्दै आइरहेका छन् । गत आइतबार डिन तथा महानिर्देशक नियुक्तिको काम गर्दा पनि उपकुलपति बराल रजिस्ट्रार र रेक्टरको कार्यालयमा बसेका थिए । उपकुलपति बरालविरुद्ध धर्ना तथा घेराउको नेतृत्व एमालेनिकट विद्यार्थी नेता तथा त्रिविका स्ववियु सचिव सिद्धान्त भट्टले गरेका छन् । उनीसहित केही विद्यार्थीले उनीमाथि मात्रै दोष थुपार्दै अवरोध गरेपछि उपकुलपतिको काममा बाधा पुगेको छ । उनीहरूले उपकुलपति कार्यालयअगाडि मागसहित कालो ब्यानर टाँसेका छन् । उपकुलपति बरालले अवरोधका कारण आफू कार्यालय जान नसकेको बताए ।
‘मेरो अफिसअगाडि विद्यार्थीले धर्ना दिइरहेका छन् । उहाँहरूका माग पूरा गर्ने पनि भनेको हो, तर उहाँहरूले धर्ना दिएपछि कार्यालय जान सकिरहेको छैन,’ उपकुलपति बरालले भने ।
प्रा. केदार रिजाल, रजिस्ट्रार, त्रिवि
उहाँहरूले विभिन्न माग राख्नुभएको छ, तर केही माग त्रिविबाट सम्भव नहुने किसिमका छन् । ती शिक्षा मन्त्रालयसँग सम्बन्धित छन् । विवाद समाधानका लागि मंगलबार कमिटी गठन गरेका छौँ ।
आफ्नै पार्टीका कुलपति प्रधानमन्त्री केपी ओलीसमक्ष भने अनेरास्ववियुले कुनै पनि माग राखेको छैन । गत बिहीबार बसेको त्रिवि सभाको साधारण बैठकमा समेत विद्यार्थी नेता भट्टलगायतले प्रधानमन्त्रीसमक्ष त्रिविका समस्या समाधानबारे कुनै माग राखेनन् । तर, राजनीतिक प्रतिशोधका आधारमा उपकुलपतिलाई अप्ठ्यारो पार्न लागिपरेको उपकुलपति कार्यालय स्रोतले बतायो । स्रोतका अनुसार प्रधानमन्त्री ओलीले आफ्नै त्रिवि कार्यालय अस्तव्यस्त बनाउने आफ्नै संगठनका नेताहरूलाई कुनै निर्देशन दिएका छैनन् । रजिस्ट्रार, रेक्टरलगायतले पनि विद्यार्थीबाट भएको अवरोध फुकाउन पहल गरेका छैनन् । ‘प्रधानमन्त्रीज्यूले आफ्नै पार्टीनिकट विद्यार्थी संगठनले भिसीलाई अवरोध गर्दा उहाँले कुनै चासो दिनुभएको छैन,’ त्रिवि स्रोतले भन्यो, ‘त्रासकै कारण उपकलुपतिज्यू कार्यालय जानुभएको छैन ।’
विद्यार्थी संगठनले उपकुलपतिसमक्ष राखेका सबै माग त्रिवि उपकुलपतिले चाहेर मात्रै पूरा गर्न सक्ने किसिमका छैनन् । विद्यार्थीले आंशिक शिक्षकलाई करार गर्ने प्रक्रिया खारेज गर्नुपर्ने, हरेक वर्ष त्रिवि सेवा आयोगको परीक्षा नियमित सञ्चालन गर्नुपर्ने, युजिसीको रिचर्स बेस्ड तथा अनुदान रकम बढाउनुपर्ने, त्रिवि कीर्तिपुरमा आठ–आठ सय छात्रा र छात्र अट्ने होस्टेल निर्माण गर्नुपर्ने, पाँच सयजनासम्म अट्ने सेमिनार हल बनाउनुपर्नेलगायत माग राखेका छन् । विगतदेखिका माग थुपारेर अवरोध गरे पनि आफ्नै पार्टीअन्तर्गतको संगठनलाई त्रिवि कुलपति तथा प्रधानमन्त्री ओलीले कुनै निर्देशन दिएका छैनन् । उनले संगठनसँग धर्ना हटाउने सम्बन्धमा कुनै पहल नगरेपछि विद्यार्थी अवरोधका कारण त्रिवि अस्तव्यस्त हुने देखिएको छ ।
त्रिविका प्रवक्ता यमनसिंह बोहराले धर्नाका कारण उपकुलपति कार्यालय जान नसकेको बताए । ‘त्रिवि क्यालेन्डर कार्यान्वयनलगायतका माग राख्दै विद्यार्थी संगठनले अवरोध गरेका छन्, कर्मचारीले पनि उस्तै दबाब दिएका छन्, कार्यालय घेराउ भएपछि भिसी सर जानुभएको छैन,’ प्रवक्ता बोहराले भने, ‘उहाँ (विद्यार्थी)हरूको ३५ सूत्रीय माग रहेछ, यत्रतत्र पर्चा र पम्प्लेट बाँडेर माग राखिरहनुभएको छ ।’
अनेरास्ववियुनिकट नेता तथा त्रिविका स्ववियु सचिव सिद्धान्त भट्टले माग पूरा नभएसम्म धर्ना नछाड्ने बताए । ‘हामी २६ गतेदेखि निरन्तर धर्नामा छौँ, २४सै घण्टा धर्नामा बसिरहेका छौँ, भिसीले माग पूरा नगरेसम्म धर्ना छाड्दैनौँ,’ उनले भने, ‘तर, उहाँलाई हामीले कार्यालय प्रवेशमा रोकेका छैनौँ, २४सै घण्टा गेटमा बसिरहेका छौँ, माग सम्बोधन नभएसम्म पछि हट्दैनौँ ।’
त्रिविका रजिस्ट्रार केदार रिजालले विद्यार्थीका केही माग पूरा गर्न नसकिने तथा अन्य निकायसँग सम्बन्धित रहेको बताए । ‘उहाँहरूले विभिन्न माग राख्नुभएको छ, तर केही माग त्रिविबाट सम्भव नहुने किसिमका छन् । ती शिक्षा मन्त्रालयसँग सम्बन्धित छन्,’ उनले भने, ‘विवाद समाधानका लागि मंगलबार कमिटी गठन गरेका छौँ ।’
