सुदूरपश्चिमको पहिलो हार, चितवनको तेस्रो जित

अफगानिस्तानका हसन इशाखिलको अर्धशतक मद्दतमा चितवन राइनोजले एनपिएलको १५औँ खेलमा तेस्रो जित निकालेको छ । लगातार तेस्रो खेलमा जित निकालेको सुदूरपश्चिम चितवनसँग ३३ रनले पराजित भएको हो । 

आइतबार कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको चितवनले निर्धारित २० ओभरमा पाँच विकेट गुमाउँदै एक सय ६५ रनको लक्ष्य दिएको थियो । जवाफी ब्याटिङ गरेकाे सुदूरपश्चिमले  १८.२ ओभरमा अलआउट हुँदा मात्र १३१ रन बनाउन सक्यो ।

चार खेलबाट सुदूरपश्चिमको ६ अंक छ। चितवनको पनि चार खेलबाट ६ अंक रह्यो। दुवै टोलीले समान एक खेल हारेका छन्।

सुदूरपश्चिमका लागि इशान पाण्डेले सर्वाधिक ३५ र सैफ जैवले १८ रन बनाए। चितवनका लागि रिजन ढकाल, कुशल मल्ल, जान निकोल इटन र अमार रौटेलाले समान दुई विकेट लिए।

यसअघि चितवनका लागि अफगानी १८ वर्षीय दायाँहाते ब्याटर इशाखिलले ५२ बलमा ६ चौका र तीन छक्कासहित सर्वाधिक ६५ रन बनाए। यसबाहेक रवि बोपाराले १८ बलमा समान दुई चौका र छक्कासहित ३६ रन बनाए।

सुदूरपश्चिमका स्कट कुगुलेइनले चार ओभरमा २० रन खर्चिँदै दुई विकेट लिए। ब्रान्डम म्याकमुलेन, दीपेन्द्रसिंह ऐरी र सैफ जैवले समान एक विकेट लिए।

यसअघि आजै भएको पहिलो खेलमा लुम्बिनी लायन्स जनकपुर बोल्ट्ससँग एक रनले पराजित भएको थियो। जनकपुरले लगातार चार जित निकाल्दा लुम्बिनी लगातार चौथो खेलमा पनि पराजित भएको हो।

सिफारिस

जनकपुर एक रनले विजयी हुँदा लुम्बिनीको लगातार चौथो हार