नेकपा (माओवादी केन्द्र)का सांसद शक्ति बस्नेतले माओवादी जनयुद्धका कारण लोकतन्त्रका मूल्य–मान्यता रक्षा भएको बताएका छन्। सोमबार प्रतिनिधिसभा बैठकमा दलका तर्फबाट बोल्दै सांसद बस्नेतले यस्तो बताएका हुन्।
भदौ १२ गते प्रतिनिधिसभाको बैठकमा एमाले सांसद योगेश भट्टराईले माओवादीको १० वर्षे हिंसा नभएको भए ०६५ सालमै देश लोडसेडिङमुक्त भइसक्थ्यो भनी टिप्पणी गरेका थिए।
सोमबारको बैठकमा माओवादी सांसद बस्नेतले भने, ‘नेपाली जनतालाई राम्रोसँग थाहा छ, माओवादीको नेतृत्वमा जनयुद्ध नभएको भए ०६५ सालभित्र लोडसेडिङको अन्त्य होइन, लोकतन्त्रका रहलपहल मूल्यहरूसमेत अन्त्य हुने निश्चित थियो । यसबारे थप कुरा गरिरहनुपर्छ र ?’
माओवादी जनयुद्धका कारण नभई अरुण जलविद्युत् आयोजना नबन्दा समयमा लोडसेडिङ अन्त्य नभएको उनको दाबी छ। ‘अरुण जलविद्युत् आयोजना यथासमयमै बन्न पाएको भए लोडसेडिङ अन्त्य हुन सक्थ्यो । लोडसेडिङ मात्र होइन, आर्थिक सामाजिक रुपान्तरणको एक–दुई पाइला अगाडि पनि बढिएको हुन्थ्यो । तर, अरुण जलविद्युत् आयोजना नबनेको जनयुद्धको कारणले हो र ? किन दिनलाई रात बनाउने ।’