जिल्ला प्रहरी परिसर काठमाडौंको सुविधायुक्त भवन तयार

संघीय राजधानी काठमाडौंको सुरक्षा जिम्मा पाएको जिल्ला प्रहरी परिसर काठमाडौंको सुविधासम्पन्न नयाँ भवन तयार भएको छ । भद्रकालीस्थित उक्त भवनबाट परिसरले २६ असारबाट नियमित सेवा प्रवाह गर्ने भएको छ । 

रामशाहपथस्थित कृषि विकास बैंकको ठीक पछाडि १५ रोपनी जग्गामा परिसरको अत्याधुनिक भवन रहेको छ । ८० करोड रुपैयाँमा कुल लागतमा बनेको भवन आठ तलाको छ । कुल क्षेत्रफलमध्ये भवन ‘स्ट्रक्चर’ मात्रै ६ रोपनीमा फैलिएको छ । अत्याधुनिक लिफ्टसहितको परिसर भवनको उद्घाटन नेपाल प्रहरीका प्रमुख आइजिपी वसन्त कुँवरले गर्ने तय भएको छ । प्रहरी परिसर काठमाडौंका प्रवक्ता एसपी नवराज अधिकारीले परिसर कार्यालय २६ असारमा सर्ने बताए । उनले भने, ‘भद्रकालीस्थित उक्त भवनमा २६ असारमा परिसर कार्यालय सर्नेछ । आइजिपीले नयाँ भवनमा कार्यालय उद्घाटन गर्ने कार्यक्रम बनेको छ ।’

यस्तो छ नयाँ भवन
काठमाडौं परिसरका अनुसार भवनको मुख्य भागमा परिसरमा कार्यरत एसएसपीदेखि प्रहरी निरीक्षकसम्मको छुट्टाछुट्टै कक्ष छन् । पिलरअनुसार विभाजन गरिएका कार्यकक्ष दर्ता हुने मुद्दा र सेवाग्राहीको चापका दृष्टिले निर्माण गरिएका छन् । भवनभित्र प्रहरीका लागि ब्यारेकसमेत छ । भवनमा हिरासत कक्ष निर्माण गरिएको छ । कार्यालयमा प्रहरीका लागि व्यायाम कक्ष रहनेछ । सर्वसाधारणको उजुरी लिने कक्षसमेत भवनमा रहनेछ । 

पार्किङका लागि अन्डरग्राउन्डमा ठाउँ छुट्याइएको छ । जहाँ एक सय गाडी र दुई सयभन्दा बढी मोटरसाइकल अटाउँछन् । भवनभित्र एकैपटक दुई सयजना अटाउने कन्फरेन्स हल छ । एक सयजना अटाउने अर्को बैठक कक्ष पनि छ । प्रहरीका लागि सुविधासम्पन्न मेस, टेलरिङ कक्ष, नास्ता कक्ष तथा मनोरञ्जन कक्ष पनि भवनभित्र निर्माण गरिएका छन् । 

भवनको प्रत्येक कक्षमा प्रकाशको राम्रो पहुँच छ । जसमा वास्तु विज्ञानलाई समेत ध्यान दिइएको छ । विशेषगरी कार्यालयका प्रमुख, उपप्रमुख तथा विशेष जिम्मेवारीमा रहने अधिकृतको कार्यकक्ष निर्माणमा ध्यान दिइएको छ । भवनको प्रवेशद्वार पनि आकर्षक बनाइएको छ ।

आधुनिक प्रविधिको उच्चतम प्रयोग
भवनभित्र आधुनिक प्रविधिलाई उच्चतम प्रयोग गरिएको छ । भवनको सम्पूर्ण भाग समेट्ने गरी सिसीटिभी जडान, अभियुक्तसँग बयान लिन अन्तर्राष्ट्रियस्तरको ‘इट्रोगेसन रुम’, अभियुक्तको म्याद थप हिरासत कक्षबाटै हुने व्यवस्था मिलाइएको छ । भिडियो कन्फरेन्स गर्न सकिने गरी अत्याधुनिक हलको डिजाइनसमेत गरिएको छ । परिसरका प्रवक्ता एसपी अधिकारीले भने, ‘भवन अत्याधुनिक शैलीमा बनेको छ । उपलब्ध भएसम्मका सबै सुविधा जडान गरिएको छ । ‘मास अरेस्ट’मा परेकाहरूलाई राख्ने छुट्टै हिरासत कक्ष छ ।’

वसन्तपुरस्थित हनुमानढोकामा रहेको परिसर १२ वैशाख ०७२ को भूकम्पपछि विस्थापित भएर टेकुमा पुगेको थियो । टेकुस्थित नेसनल ट्रेडिङ (हाल नेपाल आयल निगमको स्वामित्व)को भवन र खाली रहेको जग्गामा अस्थायी रूपमा सारिएको थियो । 

अपराध अनुसन्धान टेकु सर्ने 
जिल्ला प्रहरी परिसर काठमाडौं आफ्नो नयाँ भवनमा सरेसँगै टेकुस्थित परिसर रहेको आयल निगमको भवनमा काठमाडौं उपत्यका अपराध अनुसन्धान कार्यालय सर्ने भएको छ । अपराध अनुसन्धान कार्यालय हाल मिनभवनमा भाडाको भवनमा छ । उसको पनि नयाँ भवन टेकुमा निर्माण भइरहेको छ । निर्माण सम्पन्न नभएसम्मका लागि सो कार्यालय प्रयोग गर्न दिन प्रहरीले गृह मन्त्रालय हुँदै उद्योग, वाणिज्य तथा आपूर्ती मन्त्रालयलाई पत्राचार गरिसकेको छ । वाणिज्य मन्त्रालय पनि त्यसमा सकारात्मक रहेको एक प्रहरी अधिकारीले बताए । 

प्रहरी परिसर काठमाडौंका प्रवक्ता एसपी नवराज अधिकारी भन्छन्-भद्रकालीस्थित यस सुविधासम्पन्न भवनमा २६ असारमा परिसर कार्यालय सर्नेछ । भवनभित्र आधुनिक प्रविधिलाई उच्चतम प्रयोग गरिएको छ । भवनको सम्पूर्ण भाग समेट्ने गरी सिसीटिभी जडान, अभियुक्तसँग बयान लिन अन्तर्राष्ट्रियस्तरको ‘इट्रोगेसन रुम’, अभियुक्तको म्याद थप हिरासत कक्षबाटै हुने व्यवस्था मिलाइएको छ । भिडियो कन्फरेन्स गर्न सकिने गरी अत्याधुनिक हलको डिजाइनसमेत गरिएको छ ।