![](https://nayapatrika.blr1.cdn.digitaloceanspaces.com/news/images/money812024-06-30-09-56-04.jpeg)
कैलालीको जानकी गाउँपालिका र गाउँपालिकामातहतका स्वास्थ्य संस्थामा कार्यरत स्वास्थ्यकर्मीले नौ महिनादेखिको तलब पाएका छैनन् । गाउँपालिका, चारवटा स्वास्थ्य चौकी, पाँचवटा आधारभूत स्वास्थ्य सेवा केन्द्र र एउटा सामुदायिक स्वास्थ्य इकाइमा विभिन्न तहमा कार्यरत ४७ जना स्वास्थ्यकर्मीले गत कात्तिकयता तलब नपाएका हुन् ।
लामो समयसम्म तलब नपाउँदा घर खर्च चलाउन निकै समस्या भोग्नुपरिरहेको गाउँपालिकाको स्वास्थ्य शाखा प्रमुख जितबहादुर चौधरीले बताए । उनले ऋणसापटी गरेर घर खर्च चलाइरहेको बताए । ‘तलब नपाउँदा निकै समस्यामा छौँ, घर खर्च चलाउन र बालबालिकाको स्कुलको शुल्क तिर्न ऋण लिनुपरेको छ,’ उनले भने, ‘आर्थिक वर्ष सकिन लागिसक्यो, तलब कहिले आउने हो थाहा छैन ।’
गाउँपालिकाअन्तर्गत २७ जना स्वास्थ्यकर्मीको दरबन्दी भए पनि विभिन्न ठाउँबाट समायोजन र मिलान गरी आएका ४७ जना स्थायी स्वास्थ्यकर्मी कार्यरत छन् । दरबन्दीमा कार्यरतको तलबका लागि सुरुमा आएको बजेट बाँडेर लिएको र त्यसपछि थप बजेट नआएको गाउँपालिकाको स्वास्थ्य शाखाले जनाएको छ ।
गोदावरी नगरपालिका र नगरपालिकाअन्तर्गतका स्वास्थ्य संस्थामा कार्यरत एक सय एकजना कर्मचारीले पनि आठ महिनादेखि तलब पाएका छैनन् । पहिलो चौमासिकमा दरबन्दीमा कार्यरत कर्मचारीको तलबका लागि आएको बजेट बाँडेर लिए पनि त्यसपछि तलब नआएको नगरपालिकाका स्वास्थ्य अधिकृत नवराज अवस्थीले बताए ।
५२ जना स्वास्थ्यकर्मीको दरबन्दी रहेको नगरपालिकामा ४९ जना फाजिलमा रहेका अवस्थीले जानकारी दिए । स्वास्थ्यका सबै कर्मचारीको तलबबापतको करिब तीन करोड रुपैयाँ बजेट नआएको उनले बताए । आठ महिनादेखि तलबविनै काम गर्दा आर्थिक समस्या भइरहेको उनले बताए । ‘दरबन्दीमै कार्यरत कर्मचारीको समेत तलब आएको छैन,’ स्वास्थ्य अधिकृत अवस्थीले भने, ‘केही दिनमा आउला कि !’ कैलाली गाउँपालिकामा पनि जेठदेखिको स्वास्थ्यकर्मीको तलब नआएको प्रमुख प्रशासकीय अधिकृत खगेन्द्रराज जोशीले बताए ।
स्थानीय तहका जनप्रतिनिधिको अघिल्लो कार्यकालमा स्थानीय तहको सहमति लिएर काजसरुवा गरी आएका स्वास्थ्यका कर्मचारीले सुगमका पालिकामा दरबन्दीभन्दा बढी कर्मचारी छन् । काजसरुवाले सुगमका पालिकामा दरबन्दीभन्दा बढी स्वास्थ्यकर्मी भएपछि स्वास्थ्य मन्त्रालयले गत वर्ष काजका कर्मचारीलाई दरबन्दी भएको ठाउँमा फर्कन निर्देशन दिएको थियो । तर, पछि मन्त्रालयले यथावस्थामै काम गर्न पुनः परिपत्र गरे पनि तलब भने दरबन्दी भएको ठाउँमा पठाउने गरेको कर्मचारी बताउँछन् ।
जानकी गाउँपालिकाका प्रमुख प्रशासकीय अधिकृत आशिष चौधरीले स्वास्थ्यका कर्मचारीको तलब निकासाका लागि मन्त्रालयमा चारपटक पत्राचार गरे पनि नआएको बताए । केन्द्रबाट सहमति लिएर आएकाले गाउँपालिकामा दरबन्दीभन्दा बढी कर्मचारी रहेको बताए । नौ महिनादेखि तलब नपाएको भन्दै जानकी गाउँपालिकामा कार्यरत स्वास्थ्यर्कीले बिहीबार कालोपट्टी बाँधेर गाउँपालिकामा धर्ना दिएका छन् ।