![](https://nayapatrika.blr1.cdn.digitaloceanspaces.com/news/images/ridhi2024-06-28-09-46-55.jpeg)
रिद्धिसिद्धि सिमेन्टले यस वर्ष १५ जना विद्यार्थीलाई छात्रवृत्ति दिने भएको छ । कम्पनीले आफ्नो व्यावसायिक सामाजिक उत्तरदायित्वअन्तर्गत मकवानपुर जिल्लालाई लक्षित गरी सञ्चालन गरेको ‘मकवानपुर स्मार्ट स्टुडेन्ट अफ द इयर २०८१’ मार्फत छात्रवृत्ति दिने भएको हो ।
गत वर्ष आयोजित ‘मकवानपुर स्मार्ट स्टुडेन्ट अफ द इयर २०८०’ कार्यक्रमअन्तर्गत ११ जना विद्यार्थीले छात्रवृत्ति पाएका थिए । गत वर्षको कार्यक्रम सफल भएपछि यस वर्ष थप चारजनासमेत गरी १५ जनालाई छात्रवृत्ति दिने कम्पनीले जनाएको छ ।
यस छात्रवृत्ति कार्यक्रमअन्तर्गत ०८० मा परीक्षा दिएको र ०८१ सालमा नतिजा प्राप्त भई एसइईमा ३.५ जिपिएदेखि ४ जिपिएसहित उत्तीर्ण भएका विद्यार्थी योग्य हुन्छन् । छात्रवृत्तिअन्तर्गत पहिलो हुने विद्यार्थीलाई मासिक रूपमा पाँच हजार, दोस्रो हुनेलाई तीनहजार पाँच सय, तेस्रो हुनेलाई दुई हजार पाँच सय प्रदान गरिनेछ । त्यस्तै, सान्त्वना हुने १२ जना विद्यार्थीलाई मासिक एक हजार पाँच सय रुपैयाँ प्रदान गरिनेछ ।
यस छात्रवृत्ति कार्यक्रममा आबद्ध हुन विद्यार्थीले कम्पनीको आधिकारिक वेबसाइट वा फेसबुक पेजमा उल्लेख क्युआर कोडमा स्क्यान गरी फाराम भर्नुपर्नेछ । आवेदनको अन्तिम मिति २३ असारसम्मलाई तोकिएको कम्पनीले जनाएको छ ।