- वि.सं २o८o फाल्गुण ७ सोमबार
पूर्वराष्ट्रपति विद्यादेवी भण्डारीले सशस्त्र द्वन्द्वका पीडितहरूले न्याय पाउनेमा आशंका व्यक्त गरेकी छिन्। विगतमा देशलाई हिंसाको दुश्चक्रमा होम्नेहरूले नै आज सरकारको नेतृत्व गरिरहेको भन्दै उनले पीडितले न्याय पाउनेमा गम्भीर प्रश्न तेर्सिएको टिप्पणी गरिन्।
‘पीडितलाई केन्द्रविन्दुमा राखेर शान्ति प्रकृयाका बाँकी कामहरूलाई यथाशीघ्र सम्पन्न गर्नेतर्फ सरकारसहित सरोकारवालाहरूको ध्यान जान जरुरी छ। तर, विडम्बनाको कुरा के छ भने हिजो देशलाई हिंसाको दुश्चक्रमा होम्ने सत्तापक्ष र विद्रोही पक्ष भएर नेतृत्व गर्नेहरू नै आज सरकारको नेतृत्व गरिरहेको अवस्थामा यो देशले र निर्दोष पीडितहरूले कसरी न्याय पाउन सक्छन् भन्ने गम्भीर प्रश्न तेर्सिएको छ,’ पूर्वराष्ट्रपति भण्डारीले भनिन्।
अनौपचारिक क्षेत्र सेवा केन्द्र (इन्सेक)ले सोमबार काठमाडौंमा आयोजना गरेको नेपाल मानवअधिकार वर्ष पुस्तक २०२४ विमोचन समारोहमा बोल्दै भण्डारीले उक्त टिप्पणी गरेकी हुन्।
बृहत् शान्ति सम्झौता भएको १८ वर्ष बित्दासमेत पीडितहरूले न्याय पाउन नसकेको उल्लेख गर्दै उनले संक्रमणकालीन न्यायका संवेदनशील विषयलाई कसैले पनि आफ्नो स्वार्थ साँध्ने माध्यम बनाउन नहुने प्रस्ट पारिन्।
‘आफ्ना छोराको हत्यामा संलग्नमाथि कारबाहीको माग गर्दै अनशनमा बसेकै अवस्थामा नै मृत्यु भएका नन्दप्रसाद अधिकारीको शवको दाहसंस्कार आजसम्म हुन नसकेको विषयले पनि हाम्रो देशको संक्रमणकालीन न्यायको अवस्थालाई उजागर गरिरहेको छ। यस प्रकारको संवेदनशील विषयलाई कसैले पनि आफ्नो स्वार्थ साँध्ने माध्यम बनाउनुहुँदैन,’ भण्डारीले भनिन्।
