- वि.सं २o८o माघ २४ बुधबार
एनआइसी एसिया लघुवित्त वित्तीय संस्था लिमिटेडले लुम्बिनी प्रदेशका विभिन्न जिल्लाका शाखाले वित्तीय साक्षरता कार्यक्रम गरेका छन् । लघुवित्तका बेथरी, पडसरी, सिसहनिया, ओखरकोट, ठाकुरद्वारा, बाँसगढी र सुलीचौर शाखाले कार्यक्रम गरेका हुन् ।
संस्थाले आफ्नो संस्थागत सामाजिक उत्तरदायित्वअन्तर्गत कार्यक्रम गरेको जनाएको छ । हालको विषम परिस्थितिलाई मध्यनजर गरी स्थानीय जनप्रतिनिधि, भद्रभलादमीको उपस्थितिमा संस्थामा आबद्ध सदस्य तथा गैरसदस्यलाई विभिन्न विषयमा प्रशिक्षण दिएको जनाइएको छ ।
प्रशिक्षणमा दैनिक आम्दानी तथा खर्चको विश्लेषण, वित्तीय सेवासम्बन्धी ज्ञान, भविष्यका लागि बचतको आवश्यकता, बचत गर्ने तरिका, कर्जाको सही सदुपयोग गर्ने तरिका, व्यवसाय व्यवस्थापनजस्ता विषय समेटिएको संस्थाले जनाएको छ ।
यस कार्यक्रमबाट सहभागीले कर्जाको सदुपयोग कसरी गर्ने, कर्जा लिएर कस्तो प्रकारको व्यवसाय गर्ने, कसरी आम्दानी बढाउने, बचत कसरी बढाउने र खर्च कसरी कम गर्न सकिन्छ भन्ने विषयमा विशेष ज्ञान हासिल गर्न पाएको बताए । कार्यक्रम भएका शाखाहरूको कार्यक्षेत्रभित्रका करिब तीन सय ५० जनाले कार्यक्रममा सहभागिता जनाएको उल्लेख छ । हाल संस्थाले दुई सय ८७ शाखामार्फत वित्तीय सेवा प्रदान गर्दै आएको जनाएको छ ।
