खेलकुद प्रिन्ट संस्करण

बार्सिलोनाविरुद्ध रियलको बदला

ब्राजिलियन स्ट्राइकर भिनिसियसको ह्याट्रिकको सहयोगमा रियल म्याड्रिडले स्पेनिस सुपर कप फाइनलमा बार्सिलोनालाई ४–१ ले हरायो

 रियल म्याड्रिड छिमेकी क्लब चिरपरिचित प्रतिद्वन्द्वी बार्सिलोनालाई ४–१ ले हराउँदै स्पेनिस सुपर लिगको उपाधि जितेको छ । साउदी अरेबियामा आइतबार भएको फाइनलमा म्याड्रिडलाई उपाधि दिलाउने क्रममा चारै गोल ब्राजिलियन स्ट्राइकरले गरेका हुन् । युवा स्ट्राइकर भिनिसियस जुनियरले ह्याट्रिक र रोड्रिगोले थप एक गोल गरे । म्याड्रिडको १३औँ सुपर कपको उपाधि हात पारे । गत वर्षको फाइनलमा बार्सिलोनाले म्याड्रिडलाई ३–१ ले हराउँदै उपाधि जितेको थियो । म्याड्रिडले गत संस्करणको बदला लिएको छ । 

‘हामीले फाइनल जित्न चाहेका थियौँ,’ म्याड्रिडका प्रशिक्षक कार्लोे एन्सोलोटीले भने, ‘हामी यो जितका लागि योग्य थियौँ, खेलाडीले धेरै राम्रो खेलेका थिए ।’ बार्सिलोना र म्याड्रिडबीचको सुपर कप फाइनल साउदी अरेबियाको प्रो लिग क्लब अल नासेरको घरेलु मैदानमा भएको थियो । ह्याट्रिककर्ता भिनिसियसले पोर्चुगलका कप्तान क्रिस्टियानो रोनाल्डोलाई आइडियल मान्छन् । रोनाल्डो गत सिजनमा अल नासेरसँग अनुबन्धन भएका थिए । 

रोनाल्डोको घरेलु मैदानमा ह्याट्रिक लगाउन पाउँदा भिनिसियस दंग छन् । उनले खेलको १३औँ मिनेटमै म्याड्रिडलाई १–० को अग्रता दिलाएका थिए । खेलको ४० औँ मिनेटभित्र उनले फाइनलमा महत्वपूर्ण ह्याट्रिक पूरा गरे । ‘भिनिसियस धेरै राम्रो खेलाडीमा पर्छन्, फाइनलमा राम्रोे कमब्याक गरे,’ म्याड्रिडका प्रशिक्षक एन्सोलोटीले भने । गत नोभेम्बरमा ह्यामस्ट्रिङ भएपछि उनी पहिलोपटक मैदान फर्किएका हुन् । 

पहिलो हाफमै ह्याट्रिक
खेलको सातौँ मिनेटमा जुड वेलिंघमको पासमा भिनिसियसले गोल गरेका थिए । खेलको १०औँ मिनेटमा रोड्रिगोकै पासमा भिनिसियसले दोस्रो गोल थपे । लेवान्डोस्कीले ३३औँ मिनेटमा गोल गर्दै बार्सिलोनालाई २–१ को गोलअन्तरमा झारेका थिए । तर, ३९औँ मिनेटमा भिनिसियसले पेनाल्टी सदुपयोग गर्दै म्याड्रिडलाई ३–१ को अग्रता दिलाए । ६४औँ मिनेटमा रोड्रिगोले म्याड्रिडका लागि चोथो गोल गरे । ७१औँ मिनेटमा अरौजोले दोहोरो पहेँलो कार्डको सामना गरेपछि बार्सिलोना १० खेलाडीमा खेलेको थियो । 

बार्सिलोनोबाट एक मात्रै गोल पोल्यान्डका रोबर्ट लेवान्डोस्कीले गरे । दोस्रो हाफमा दोहोरो कार्ड पाएपछि बार्सिलोनाका रक्षक रोनाल्डो अरौजोले मैदान छाडेका थिए । हारपछि बार्सिलोनाका प्रशिक्षक जाभी हर्नान्डेज खुसी देखिएनन् । उनले सुपर कपको उपाधि गुमाए पनि बाँकी प्रतियोगितामा ट्रफी उचाल्न मिहिनेत गर्नुपर्ने प्रतिक्रिया दिए । ‘आजको खेल निकै कठिन थियो हामीसँग अझै धेरै समय बाँकी छ,’ हर्नान्डेजले भने, ‘हामी बलियो भएर अझै केही ट्रफी हात पार्न सक्छौं ।’