- वि.सं २o८o पौष २४ मंगलबार
बढ्दो चिसो र शीतलहरको कारण जनजीवन प्रभावित भएको भन्दै सिराहाका तीनवटा पालिकाले एक साता जाडो बिदा दिएका छन् ।
सिराहाको गोलबजार तथा लाहान नगरपालिका र लक्ष्मीपुर पतारी गाउँपालिकाले पालिका क्षेत्रका विद्यालयहरूमा एक साता जाडो विदा दिएका हुन् ।
गोलबजार नगरपालिकाका शाखा अधिकृत सुवोधकुमार लामाले शीतलहर र चिसोको कारण विद्यार्थीहरूको स्वास्थ्यमा प्रतिकूल असर पर्न भएकाले २५ देखि २९ पुससम्म जाडो विदा दिइएको जानकारी दिए ।
लाहान नगरपालिकाको शिक्षा, युवा तथा खेलकुद शाखाले २९ पुससम्म हिउँदे तथा १ माघमा माघे संक्रान्ति विदा लगत्तै २ माघदेखि विद्यालय नियमित संचालन हुने जनाएको छ ।
लक्ष्मीपुरपतारी गाउँपालिकाका शिक्षा अधिकृत रामबालक पासमानले सूचना जारी गर्दै मंगलबारदेखि लागू हुने गरी आगामी २ माघसम्म जाडो विदा दिइएको जनाएका छन् ।
गाउँपालिका क्षेत्रभित्रका विद्यालयहरूमा अत्यधिक चिसोका कारणले अध्ययन अध्यापन प्रभावित हुने भएकाले वर्षे विदाबाट कट्टा हुने गरी मंगलबारदेखि २ माघसम्मका लागि जाडो विदा दिइएको सूचनामा उल्लेख छ ।
पछिल्लो केही दिनयता बाक्लो हुस्सु कुहिरोसँगै तापक्रम घटेपछि जनजीवन प्रभावित बन्दै आएको छ । बाक्लो हुस्सु र कुहिरो प्रायः दिउँसोसम्म लाग्ने गरेकाले जनजीवन प्रभावित बनेको हो ।
