त्रिभुवन विश्वविद्यालय, केन्द्रीय पुस्तकालयको नवनिर्मित भवनको आज उद्घाटन हुँदै छ । नेपाल भ्रमणमा रहेका भारतीय विदेशमन्त्री एस जयशंकरले त्रिविपरिसरमा हुने कार्यक्रमका नयाँ भवनको शुभारम्भ गर्ने जनाइएको छ ।
भारतीय सहयोगमा निर्मित तीनतले पुस्तकालय भवनमा दुई हजार विद्यार्थीले अध्ययन गर्न सक्नेछन्। त्रिवि केन्द्रीय पुस्तकालयका कार्यकारी निर्देशक सागरराज सुवेदीका अनुसार तीन तला नयाँ भवन अपांगमैत्री तथा लिफ्टलगायतका सुविधासमेत छन् ।
नयाँ भवन पाएसँगै पुस्तकालयमा किताब जारी गर्न र फिर्ता भएको पुस्तकको अभिलेख राख्ने विशेष प्रणाली आरएफ आइडी (रेडियो फ्रिक्वेन्सी आइडेन्टिफिकेसन सिस्टम)समेत जडान हुनेछ। पुस्तकालय कुल सात हजार आठ सय वर्गफिट फराकिलो रहेको जानकारी पनि उनले दिए ।
०७७ मा पुस्तकालय भवन निर्माण सुरु भएको थियो । पुस्तकालयमा भारतीय पुस्तकको छुट्टै कोठासमेत रहनेछ। यसबाहेक पुस्तकालयमा ५० वटाभन्दा बढी संख्यामा कम्प्युटरसमेत अध्ययनकर्तालाई उपयोग गर्न दिइने जनाइएको छ।