- वि.सं २o८o पौष १६ सोमबार
काठमाडौंमा एक युवकको अपहरण गरी १३ लाख २० हजार फिरौती असुल गर्ने चारजनालाई प्रहरीले पक्राउ गरेको छ । जिल्ला प्रहरी परिसर, काठमाडौंले अपहरणमा संलग्न माकलबारीका ४२ वर्षीय तेजमान तामाङ र २६ वर्षीय सौगात तामाङ, थलीका ३२ वर्षीय कर्मा छेवाङ थिङ र ३८ वर्षीय सम्राट भन्ने बीरे तामाङलाई पक्राउ गरेको हो ।
उनीहरूले रसुवाका हिस्सीथाया तामाङलाई १० मंसिरमा चाबहिलबाट अपहरण गरी ट्याक्सीमा राखी गागलफेदीको होटेलमा राखेर बन्धक बनाएका थिए । तामाङसँग चेक लिएर भोलिपल्ट बैंकमा गई पैसा साटेपछि उनलाई मुक्त गरेका थिए । घटना एक महिनाअघिको भए पनि निरन्तर अनुसन्धान गरी हाल पक्राउ गरिएको काठमाडौंका प्रहरी प्रमुख एसएसपी भूपेन्द्र खत्रीले बताए ।
अपहरणका योजनाकार भने पीडितकै गाउँका भएको खुलेको छ । उनीहरू फरार छन् । हिस्सीथाया रसुवाको एक जलविद्युत् आयोजनामा काम गर्थे । गाउँकै एक व्यक्तिसँग विवाद भएपछि उनले नै अपहरणको योजना बनाएर सूचना दिएका थिए । योजनाकार पक्राउ नपरेकाले कारण खुल्न सकेको छैन ।
