- वि.सं २o८o पौष ९ सोमबार
प्रो क्लब च्याम्पियन टी–२० क्रिकेट प्रतियोगिताको पाँचौँ दिनको पहिलो खेलमा सशस्त्र प्रहरी बलले वन्डर क्लब नोयडालाई एक सय ४५ रनको लक्ष्य दिएको छ । नारायणी रंगशालामा जारी खेलमा पहिले ब्याटिङ गरेको सशस्त्र प्रहरीले २० ओभरमा पाँच विकेटको क्षतिमा एक सय ४४ रन बनाएको हो ।
खेलमा सशस्त्रका खेलाडी आसिफ शेखले २२ बलमा १९ रन बनाए । हरिशंकर साहले २५ बलमा २३ रन बनाए । प्रदीप ऐरीले २२ बलमा २४ रन हाने । अर्को खेलाडी सन्दीप जोराले १५ बलमा २० रनको योगदान गरे भने लोकेश बमले १५ बलमा १९ रन बनाए ।
नोएडाका कप्तान अल्पित गुप्ताले दुई विकेट लिए । चार ओभरमा २० रन दिए ।अर्को बलर हर्षित सेठीले तीन ओभरमा ३५ खर्चिएर एक विकेट लिए । सञ्जीव चतुर्वेदीले चार ओभरमा ३५ रन दिए । यस्तै, दिवान्स रावतले तीन ओभरमा ६ रन दिँदै एक विकेट पाए । प्रतियोगितामा नेपालका तीन विभागीय टोली आर्मी, पुलिस र एपिएफसहित पर्सा ११ तथा भारतको युपी– ११ र वन्डर्स क्लब नोइडाले प्रतिस्पर्धा गर्दै छन् ।
आजै दिउँसो १ बजे हुने अर्को खेलमा नेपाल आर्मी र युपी– ११ ले प्रतिस्पर्धा गर्ने भएका छन् ।
