- वि.सं २o८o असार २६ मंगलबार
नेपाल रेडक्रस सोसाइटीमा डा. नेत्र तिमल्सिनाको नेतृत्वमा नयाँ कार्यसमिति चयन भएको छ । सोमबार मुलुकभरका प्रतिनिधिले डा. तिमल्सिनाको नेतृत्वमा ३३ सदस्यीय नयाँ कार्यसमिति चयन गरेका हुन् । सोसाइटीकाे उपाध्यक्षमा डा. विशाल भण्डारी चयन भएका छन् ।
त्यस्तै, महिला उपाध्यक्षमा चन्द्रकला कार्की, महामन्त्रीमा दीपेन्द्रराज ढकाल, कोषाध्यक्षमा सीताराम कोइराला, उपमहामन्त्रीमा जगदीश भट्टराई, उपकोषाध्यक्षमा होम पाठक चयन भएका छन् ।
मुलुकभरबाट आएका प्रतिनिधिले नयाँ कार्यसमिति सर्वसम्मतले चयन गरेको नयाँ कार्यसमितिका उपाध्यक्ष डा. भण्डारीले बताए । पटक–पटकको प्रयासपछि पनि निर्वाचन हुन नसकेपछि जिल्ला प्रशासन कार्यालयले महाधिवेशन गर्न पुनः निर्देशन दिएको थियो ।
सोही निर्देशनअनुसार सोसाइटीले २७ र २८ असारमा अधिवेशनको मिति तय गरेको थियो । तर, उक्त अधिवेशन अवैधानिक भएको भन्दै सर्वोच्च अदालतमा रिट निवेदन परेको छ । उक्त निवेदन अदालतमा विचाराधीन छ ।
