- वि.सं २o८o असार २३ शनिबार
प्रधानमन्त्री पुष्पकमल दाहाल प्रचण्डले बाढीपीडितलाई राहत दिन र विपत्को जोखिममा रहेका बस्तीको अध्ययन गरी स्थानान्तरणको प्रबन्ध मिलाउन निर्देशन दिएका छन् ।
विपत् जोखिम न्यूनीकरण तथा व्यवस्थापन राष्ट्रिय परिषद्को शुक्रबार बसेको बैठकमा प्रधानमन्त्री एवं परिषद्का अध्यक्ष प्रचण्डले भने, ‘निजी तथा सार्वजनिक संरचना र सम्पत्ति, भौतिक क्षति तथा नोक्सानीको आकलन गर्न, जोखिमयुक्त बस्तीको अध्ययन गर्न र जोखिमयुक्त देखिएका बस्ती स्थानान्तरणको उपयुक्त प्रबन्ध मिलाउन निर्देशन दिन्छु ।’
उनले मनसुनजन्य घटनाबाट मानवीय क्षति पुगेका र घरवारविहीन बनेका परिवारलाई राहत वितरण गर्न र निजी आवास पुनर्निर्माणमा सहयोग गर्न पनि मातहतका निकायलाई निर्देशन दिए ।
