जनमतलाई सरकारमा ल्याउने र केही मन्त्री हेरफेर गर्ने प्रधानमन्त्रीको तयारी
केन्द्रमा एक शक्तिशाली मन्त्रालय, बजेटमा संशोधन र प्रदेशमा विनाविभागीय बनाइएका आफ्ना दुई मन्त्रीलाई जिम्मेवारीमा फर्काए सरकारमा आउन सकिने जनमतको सर्त
बजेटमा गठबन्धनकै दलहरू असन्तुष्ट भएपछि दबाबमा आएका प्रधानमन्त्री पुष्पकमल दाहाल प्रचण्डले मन्त्रिपरिषद् हेरफेरमार्फत असन्तुष्टि सम्बोधनको प्रयास थालेका छन् । १० पुसमा प्रधानमन्त्री प्रचण्डले हालसम्म ११ पटक मन्त्रिपरिषद् विस्तार गरिसकेका छन् ।
पछिल्लोपटक प्रधानमन्त्री प्रचण्डले बजेटमा असन्तुष्ट दललाई सरकारमा फर्काउन मन्त्रिपरिषद् हेरफेरको १२औँ कसरत थालेका हुन् । यही वेला अन्य मन्त्रीको समेत जिम्मेवारी हेरफेर हुन सक्ने स्रोत बताउँछ । समर्थन गर्ने दलहरू विभिन्न समयमा बाहिरिँदा सरकारको बहुमतको अंकगणित जोखिममा पर्ने डर हुन्छ । प्रधानमन्त्री प्रचण्डले आइतबार बालुवाटारमै बोलाएर जनमतका अध्यक्ष सिके राउतसँग भेट गरी सरकारमा सहभागी हुन प्रस्ताव गरेका छन् ।
जनमत पार्टीका नेताहरूले सरकारलाई दिएको समर्थन फिर्ता लिन सक्ने बताइरहेका वेला प्रधानमन्त्री र राउतबीच भेट भएको हो । सहमतिअनुसार उद्योग मन्त्रालय नपाएपछि सरकारबाट बाहिरिएको सिके राउत नेतृत्वको जनमत पार्टीलाई सरकारमा फर्काउन प्रधानमन्त्रीले पहल थालेका हुन् ।
प्रधानमन्त्रीका प्रेस सल्लाहकार गोविन्द आचार्यका अनुसार आइतबार प्रधानमन्त्रीले राखेको प्रस्तावमा राउत सकारात्मक छन् । ‘प्रधानमन्त्रीले सरकारमा आउन गरेको आग्रहमा राउत सकारात्मक हुनुहुन्छ । मन्त्रालयका विषयमा उहाँको चासो थियो । जवाफमा प्रधानमन्त्रीले गठबन्धनमा रहेका दलहरूबीच छलफल गरेर निर्णय लिन सकिने बताउनुभएको छ,’ आचार्यले भने ।
राउतसँगको भेटघाटपछि जनमतलाई सरकारमा फर्काउने विषयमा प्रधानमन्त्रीले सत्तागठबन्धनका दलहरूसँग परामर्श थालेका छन् । आइतबार साँझ एकीकृत समाजवादीका अध्यक्ष माधव नेपालसँग प्रधानमन्त्रीले यस विषयमा छलफल गरेको उनका प्रेस सल्लाहकार आचार्यले बताए । ‘सत्तागठबन्धनभित्रका दलहरूसँग परामर्श सुरु भएको छ,’ उनले भने, ‘साँझ मात्रै माधव नेपालसँग भेटघाट भएको थियो । जनमतलाई सरकारमा ल्याउने विषयमा उहाँ सकारात्मक हुनुहुन्छ । अन्य दलका नेतासँग पनि आजभोलि नै छलफल गर्ने तयारी छ ।’ आफूसँग भएको मन्त्रालय दिएर भए पनि माग पूरा गर्न तयार रहेको सन्देश प्रधानमन्त्रीले दिएको जनमतका नेताहरूको दाबी छ । जनमतका उपाध्यक्ष अब्दुल खानका अनुसार भेटमा अध्यक्ष राउतले प्रधानमन्त्रीसँग तीन सर्त राखेका छन् ।
पूर्वखानेपानीमन्त्री तथा जनमतका उपाध्यक्ष अब्दुल खान भन्छन् ‘जनमतलाई सरकारमा ल्याउने विषयमा प्रधानमन्त्री सकारात्मक हुनुहुन्छ । उहाँले तपाईं सरकार छोडेर नजानुस्, माग सम्बोधन गर्छु भनेर आश्वासन दिनुभएको छ । आफ्नो मन्त्रीलाई फिर्ता गरेर भए पनि मिलाउँछु भन्ने उहाँको प्रतिबद्धता छ । बजेटमा सुझाव सम्बोधन गर्छु भन्नुभएको छ । एक–दुई दिनभित्रै टुंगो लगाउँछु भन्ने उहाँको भनाइ छ ।’
प्रधानमन्त्रीसँगको भेटमा राउतले केन्द्रमा एक शक्तिशाली मन्त्रालय, बजेटमा संशोधन र प्रदेशमा विनाविभागीय बनाइएका आफ्ना दुई मन्त्रीलाई जिम्मेवारीमा फर्काए आफू सरकारमा आउन सकिने सर्त राखेका छन् । जवाफमा प्रधानमन्त्री सकारात्मक सुनिएको जनमतका उपाध्यक्ष खानले बताए ।
‘जनमतलाई सरकारमा ल्याउने विषयमा प्रधानमन्त्री सकारात्मक हुनुहुन्छ । उहाँले तपाईं सरकार छोडेर नजानुस्, माग सम्बोधन गर्छु भनेर आश्वासन दिनुभएको छ । आफ्नो मन्त्रीलाई फिर्ता गरेर भए पनि मिलाउँछु भन्ने उहाँको प्रतिबद्धता छ । बजेटमा सुझाव सम्बोधन गर्छु भन्नुभएको छ । एक–दुई दिनभित्रै टुंगो लगाउँछु भन्ने उहाँको भनाइ छ,’ जनमतका तर्फबाट पूर्वखानेपानीमन्त्रीसमेत बनेका खानले भने ।
यसपटकको बजेट मधेसप्रति अनुदार र विभेदकारी भएको आवाज उठाउँदै जनमतले विरोध जनाउँदै आएको थियो । यही कारण प्रतिनिधिसभाको बजेट पारितका लागि भएको मतदानमा समेत जनमत तटस्थ बसेको थियो । सरकारसँग निरन्तर असन्तुष्ट जनमत पार्टीभित्र सरकारलाई दिएको समर्थन नै फिर्ता लिने तयारी थालिएपछि प्रधानमन्त्री प्रचण्डले राउतलाई रोक्न कसरत थालेका हुन् ।
जनमतका महासचिव एवं प्रवक्ता चन्दन सिंहले प्रधानमन्त्रीसँगको पछिल्लो भेटघाट सरकार फर्काउन गरिएको आग्रहकै निरन्तरता रहेको बताए । ‘यो भेटघाट अस्तिदेखि भइरहेको आग्रहकै निरन्तरता हो,’ उनले भने, ‘सरकारमा आउन आग्रह गर्नुभएको छ, हामी जाने–नजाने विचार गर्दै छौँ । खासमा सरकारमा टिकाउने भन्ने कुरा प्रधानमन्त्रीमा निर्भर हुने कुरा हो । हाम्रा माग बिस्तारै मान्दै हुनुहुन्छ । सायद कुरा मिल्छ होला ।’
पूर्वसहमतिविपरीत सत्ता राजनीतिबाट धकेलिएपछि पछिल्लो समय जनमत सरकारसँग चिढिएको अवस्था थियो । मधेसमा प्रमुख प्रतिस्पर्धी रहेको जनता समाजवादी पार्टी (जसपा)लाई काखी च्यापेर आफूहरूलाई पाखा लगाइरहेको जनमतको निष्कर्ष थियो । १० पुसमा सरकार गठनका लागि बनेको गठबन्धनकै वेला सरकारमा सहभागी भएको जनमत पार्टी लामो पर्खाइमा पनि चित्तबुझ्दो मन्त्रालय नपाएपछि १७ चैतमा सरकारबाट बाहिरिएको थियो ।