- वि.सं २o८o बैशाख १३ बुधबार
जुम्लाको तातोपानी गाउँपालिका - ४ गौतमबाडामा सकेट बम भेटिएको छ ।
स्थानीय लक्ष्मीप्रसाद गौतमको दाउरा राखिएको स्थानमा सकेट बम भेटिएको हो । बम देखेपछि स्थानीयले हाँकुस्थित प्रहरी चौकीलाई खबर गरेका थिए ।
अहिले बम भेटिएको स्थानमा सुरक्षाका लागि प्रहरी सहायक निरीक्षक राजेन्द्र गिरी नेतृत्वमा टोली खटिएको छ ।
जिल्ला प्रहरी कार्यालय जुम्लाका सूचना अधिकारी धर्मराज जोशीका अनुसार उक्त ठाउँ सिल गरेर थप सुरक्षा प्रदान गरिएको छ । स्थानीयलाई बम भेटिएको स्थान वरपर जान दिइएको छैन ।
साथै, अनुसन्धान गरी डिस्पोज गर्न नेपाली सेनालाई खबर गरिएको प्रहरीले जनाएको छ । सकेट बम भोलि बिहान निष्क्रिय गर्ने तयारी गरिएको छ ।
सो सकेट बम द्वन्द्वकालमा छोडिएको बम हुन सक्ने अनुमान गरिएको छ । केही वर्षअघि पुराना घर भत्काउने क्रममा बेवारिसे बम विस्फोट हुँदा एक महिला घाइते भएकी थिइन् ।
