जाडोमा देखिन सक्छन् यस्ता स्वास्थ्य समस्या

जाडोमा रुघाखोकी, दम, जोर्नी दुख्नेलगायत समस्याले मानिसलाई सताइरहेको हुन्छ । खानपिनमा ध्यान दिने तथा न्यानो भएर बस्ने गरियो भने यस्ता समस्याबाट बच्न सकिन्छ । यस मौसममा सरसफाइमा विशेष ध्यान दिनुपर्छ । 

रुघा–खोकी 
जाडो मौसममा रुघा, खोकी र ज्वरो आउने गर्छ । यस्तो वेलामा शरीरको प्रतिरोधात्मक क्षमता कमजोर हुन्छ । र, चाँडै यी समस्याले भेट्छ । संक्रमणबाट बच्न विशेष गरी चिसोबाट बच्नुपर्छ । झोलिलो खानेकुरा खानुपर्छ । सरसफाइमा विशेष ध्यान दिनुपर्ने हुन्छ । खाना खानुअघि र पछि साबुनपानीले हात धुनुपर्छ । यसले भाइरल इन्फेक्सन हुनबाट जोगाउँछ । प्रशस्त फलफूल खानुपर्छ । जसमा मौसम, कागती, सुन्तलालगायतका फलफूल खानुपर्छ । चना, केराउ, गेडागुडीको दाल खानुपर्छ । यसका अलावा बाफ लिनु, नुनपानीले कुल्ला गर्नु लाभदायक हुन्छ । तातो झोलिलो पदार्थ बढी मात्रामा प्रयोग गर्नुपर्छ । चिसो पानी पिउनुहुँदैन । तुरुन्त गर्मीबाट चिसोमा र चिसोबाट गर्मीमा जानुहुँदैन । बाइक वा स्कुटर चलाउने वेलामा नाक, मुख छोप्ने गरी हेलमेट लगाउनुपर्छ । कोल्ड ड्रिंक्स, आइसक्रिमबाट टाढा रहनुपर्छ । यस मौसममा केटाकेटी र बुढापाकाको विशेष ख्याल राख्नुपर्छ । 

टन्सिल 
बालबालिकामा टन्सिलको समस्या आमरूपमा देखिन्छ । यो ब्याक्टेरियल या भाइरस संक्रमणबाट हुन सक्छ । यो समस्या भएमा घाँटीमा दुखाइ महसुस, खाना खान तथा बोल्न समस्या, ज्वरो आउने हुन सक्छ । यसबाट बच्न चिसो पेय पदार्थ तथा चिसो खानेकुराको सेवन गर्नुहुँदैन । 

दम
दम एक किसिमको एलर्जिक रोग हो । दमबाट पीडित बिरामीको समस्या जाडोमा बढ्न सक्छ । रातको समयमा, चिसो बढेका वेला तथा जाडोमा एलर्जी एटेक हुने सम्भावना बढी हुन्छ । अतः दमका रोगीहरू एलर्जिक तŒव तथा चिसो हावाबाट बच्नुपर्छ । धुलो, माटो, धुवाँ र वायु प्रदूषणबाट बच्न एकदमै जरुरी हुन्छ । दमका रोगीले नियमित सेवन गर्ने औषधि साथमै राख्नुपर्छ । चिकित्सकको सल्लाहविना बीचमै औषधि छाड्नुहुँदैन । 

जोर्नीको दुखाइ 
वृद्धवृद्धामा बदलिँदो मौसममा हातखुट्टाका जोर्नी दुख्ने समस्या बढी देखिन्छ । अर्थराइटिस, सानो जोर्नीमा दुखाइ, घुँडाको दुखाइ असह्य हुन्छ । यसबाट बच्न सकेसम्म चिसो हावामा बाहिर निस्किने गर्नुहुँदैन । जोर्नीमा तातो सेकाइका लागि पट्टी या हट ब्यागको प्रयोग गर्न सकिन्छ । सामान्य किसिमको व्यायाम नियमित रूपले गर्नुपर्छ । होमियोप्याथिक औषधिका साथसाथै योगा तथा फिजियोथिरापीले पनि जोर्नीको दुखाइबाट आराम मिल्छ । साथै, नियमित औषधिको सेवन गरिराख्ने तथा चिकित्सकसँग वेला–वेलामा सम्पर्क गरी स्वास्थ्य परीक्षण गराइरहने गर्नुपर्छ ।