ग्वार्कोमा बन्ने भयो नेपालको पहिलो ‘फ्लाई ओभर’ 

ललितपुरस्थित ग्वार्काे चोकमा बनाउने भनिएको ‘फ्लाई ओभर’ (ओभर पास) निर्माण आगामी शुक्रबार (२३ मंसिर)बाट सुरु हुने भएको छ । आयोजनाको ठेक्काप्राप्त आरसी, समानान्तर र रेलिग्रेले शुक्रबारदेखि निर्माण सुरु गर्न लागेका हुन् ।
सडक विभागका महानिर्देशक अर्जुनजंग थापाले शुक्रबारदेखि ग्वार्काे फ्लाई ओभरको निर्माण सुरु हुने बताए । त्यसका लागि आवश्यक तयारी पूरा भएको उनको भनाइ छ ।

विभागले ट्राफिक व्यवस्थापन सहज बनाउने उद्देश्यसहित चक्रपथको ग्वार्काे, एकान्तकुना र सातदोबाटो चोकमा फ्लाई ओभर बनाउने योजना अघि बढाएको थियो । त्यसमा पहिलो चरणअन्तर्गत ग्वार्काे चोकको फ्लाई ओभर निर्माण गर्न लागिएको हो । नेपालको सडक सञ्जालनमा बन्न लागेको यो पहिलो फ्लाई ओभर पुल हो । 

यद्यपि, नागढुंगा सुरुङमार्गमा पनि एक फ्लाई ओभर निर्माण हुनेछ । तर, त्यसको अझै निर्माण सुरु भएको छैन । हाल त्यसको डिजाइन बनाउने काम भइरहेको छ । सडक विभागको गुणस्तर, अनुसन्धान तथा विकास केन्द्रका निर्देशक नवीनमान श्रेष्ठले नेपालका लागि यो नै पहिलो फ्लाई ओभर हुने बताए । 

विभागले इपिसी (इन्जिनियरिङ प्रोक्युरमेन्ट एन्ड कन्स्ट्रक्सन) मोडलमा उक्त आयोजना बनाउने गरी साउन ०७८ टेन्डर आह्वान गरेको थियो । त्यसपछि माघ ०७८ मा आरसी, समानान्तर र रेलिग्रे जेभी त्यसमा छनोट भएका थिए । त्यसलगत्तै ठेक्का सम्झौता गरेर निर्माण कम्पनीहरूले फागुन ०७८ देखि आयोजनाको डिजाइन बनाउन सुरु गरेका थिए । यस आयोजनाको डिजाइन गत साता मात्रै सडक विभागबाट स्वीकृति भएको थियो । 

यस्तो हुनेछ फ्लाई ओभर 
यस फ्लाई ओभरको कुल लम्बाइ चार सय ९० मिटर हुनेछ । त्यसमा बालकुमारीतर्फबाट दुई सय ८० मिटर लामो ¥याम र सातोबाटोतर्फबाट एक सय ७५ मिटर लम्बाइको र्‍याम बनाइनेछ । बीचको सुपर स्ट्रक्चरको लम्बाइ भने ३५ मिटर लामो हुनेछ । फ्लाई ओभरको उचाइ ६ मिटरको हुनेछ । अन्तर्राष्ट्रिय मापदण्डअनुसार फ्लाई ओभरको उचाइ ६ मिटर राखिएको हो । 

चक्रपथको यो खण्ड हाल आठ लेनको छ । त्यसमा बीचको चार लेनको सडकलाई फ्लाई ओभरमार्फत माथि उठाइनेछ, जसमा चक्रपथमै आवतजावत गर्ने सवारीसाधन चल्नेछन् । मंगल बजार–इमाडोल–मंगलबार आवतजावत गर्ने सवारीसाधन भने फ्लाई ओभरमुनिबाट जानुपर्नेछ । 

फ्लाई ओभर नेपाल सरकारकै लगानीमा बन्नेछ । त्यसमा १७ करोड ६८ लाख रुपैयाँ लगानी गरिएको विभागको भनाइ छ । निर्माण कम्पनीसँग सोहीअनुसार नै ठेक्का सम्झौता भएको विभागको भनाइ छ । 

 यसरी गरिँदै छ ट्राफिक व्यवस्थापन 
फ्लाई ओभर निर्माण अवधिभर उक्त चोकमा ट्राफिक व्यवस्थापन गर्न उपत्यका ट्राफिक प्रहरी कार्यालयले वैकल्पिक डाइभर्सनको व्यवस्था गरिसकेको छ । निर्माण अवधिभर कोटेश्वरबाट सातदोबाटोतर्फ जाने यात्रुवाहक, माहलवाहक तथा दुईपांग्रे सवारीसाधनलाई बालकुमारी पुलबाट सर्भिस लेनमा र साना चारपांग्रे सवारीसाधनलाई फास्ट ट्र्याकबाट चलाइनेछ । कोटेश्वरबाट सातदोबाटोतर्फ जाने र आउने सम्पूर्ण सवारीसाधनलाई भने ग्वार्काे चोकभन्दा ६ सय मिटरअगाडि र पछाडि सर्भिस लेनबाट सञ्चालन गरिनेछ । बल्खुबाट सातदोबाटो हुँदै कोटेश्वरतर्फ आउने सवारीसाधनलाई सर्भिस लेनमा र साना चारपांग्रे गाडीलाई फास्ट ट्र्याकबाट सञ्चालन गरिनेछ ।

 सातदोबाटो र एकान्तकुनामा फ्लाई ओभर बन्ने कहिले ? 
विभागले योबाहेक सातदोबाटो र एकान्तकुनामा पनि फ्लाई ओभर बनाउने प्रक्रिया अघि बढाएको छ । त्यसको सम्भाव्यता अध्ययनसमेत सम्पन्न भइसकेको छ । तर, निर्माण सुरु गर्ने विषय भने अझै टुंगो नलागेको विभागका निर्देशक नवीनमान श्रेष्ठले बताए । विभागले बहुवर्षीय आयोजनाअन्तर्गत उक्त फ्लाई ओभरहरू बनाउन राष्ट्रिय योजना आयोग र रकम सुनिश्चितताका लागि अर्थ मन्त्रालयमा पत्र पठाएको छ । तर, हालसम्म त्यसको कुनै प्रतिक्रिया नआएको श्रेष्ठको भनाइ छ ।

कहिले बनिसक्छ फ्लाई ओभर ? 
विभागले निर्माण कम्पनीसँग दुई वर्षको अवधिसहित ठेक्का सम्झौता गरेको छ । त्यसमा डिजाइन बनाउन नौ महिना समय लागेको छ । १४ महिनाको समय तोकेर ट्राफिक कार्यालयमा पत्र पठाएको छ ।