दुई जुत्तामा चार सय हिरा जडित
अमेरिकी टेसिन स्टार महिला खेलाडी सेरेना विलियम्स करिअरकै अन्तिम ग्रान्डस्लाम प्रतियोगिता युएस ओपनमा सहभागिता जनाइरहेकी छिन् । वर्षको अन्तिम ग्रान्डस्लाममा उनले पहिलो चरणमा सानदार जित निकालिन् । युएस ओपनको प्रत्येक खेलमा सेरेनाको खेल निकै चासोपूर्वक हेरिनेछ । एक खेलमा पराजित हुँदा टेनिस खेलकै महान् खेलाडी सेरेनाको करिअर समाप्त हुनेछ । यसै कारण पहिलो चरणको खेलमा उनको खेल हेर्न २२ हजार दर्शकको उपस्थिति थियो ।
खेलसँगै सेरेनाको अर्को पक्ष पनि चर्चा भइरहेको छ । त्यो हो, उनले लगाएको हिराको जुत्ता । जसमा स–साना चार सय वटा हिराका टुक्रा जडित छन् । २३ पटक ग्रान्डस्लाम च्याम्पियन सेरेनाले पहिलो चरणमा हिराजडित जुत्ता लगाएकी थिइन् । जसका कारण खेलभन्दा पनि जुत्ताको चर्चा अहिले चुलिएको छ । सेरेनाले भाइरल बनेको जुत्ता नाइकको लगाएकी थिइन् ।
यसअघि उनी आफ्नै डिजाइनको ड्रेसमा उत्रिँदा चर्चामा आएकी थिइन् । उनकी पाँच वर्षीया छोरी ओलम्पियाले समेत आमाको जस्तै पहिरन लगाएको दृश्य ‘भाइरल’ बनेको थियो । युएस ओपन महिला पहिलो चरणमा सेरेनाले मोन्टेनिग्रोलाई ६–३ र ६–३ को सोझो सेटमा हराएकी थिइन् । उनको खेल हेर्न अमेरिकाका पूर्वराष्ट्रपति बिल क्लिन्टन, मार्टिना नवरातिलोभा, माइक टाइसनका साथै सेरेनाका बुबा, दिदी र छोरी थिइन् ।
१६ वर्षमै युएस ओपन विजेता
सेरेनाले सन् १९९९ मा १६ वर्षको उमेरमा युएस ओपन उपाधि जितेकी थिइन् । खेल जितेपछि सेरेनाले भनेकी थिइन्, ‘जब कोर्टमा आएकी थिएँ, तब समर्थकले जुन तरिकाले स्वागत गरे, त्यसले निकै खुसी छु । म यो कहिल्यै भुल्न सक्दिनँ ।’ १७ वर्षको उमेरमा पहिलो खेल जित्दासमेत सेरेनाले आफ्नो कपालमा मोती लगाएकी थिइन् । ४० वर्षको उमेरमा समेत हिराको जुत्ता लगाउँदै सेरेनाले अन्तिम प्रतियोगिता यादगार बनाएकी छिन् । ४० वर्षीया सेरेनाले महिला टेनिस जगत्मा थुप्रै कीर्तिमान आफ्नो नाममा राखेकी छिन् । उनले ३२ वर्षको उमेरपछि ६ ग्रान्डस्लाम उपाधि हात पारेकी थिइन्, जुन आफैँमा कीर्तिमान बन्यो ।
गर्भवती अवस्थामै अस्ट्रेलियन ओपन उपाधि
युएस ओपनमा डेब्यु गर्दा सेरेनाको उमेर १६ वर्ष मात्र थियो । त्यसको एक वर्षपछि उनले उपाधि नै हात पारिन् । सन् १९९८ मा उनले ग्रान्डस्लाममा सहभागिता जनाइन् । सन् १९९९ पछि उनले जतिपटक ग्रान्डस्लाम उपाधि हात पारिन्, ती सबै रेकर्डका रूपमा रह्यो । २२ वर्षको उमेरमा सेरेनाले वर्षमा आयोजना हुने चारवटै ग्रान्डस्लाम उपाधि जितेकी थिइन् ।
सन् २०१६ मा उनी गर्भवती थिइन् । गर्भवती अवस्थामै उनले अस्ट्रेलियन ओपन हात पारिन् । सन् २०१७ मा ओलम्पियालाई जन्म दिएपछि सेरेना केही समय कोर्टबाट बाहिर रहिन् ।
