एक वर्षमा ४९ जनाको मृत्यु, ज्यान गुमाउनेमा अधिकांश मोटरसाइकलचालक
तनहुँमा एक वर्षमा सवारी दुर्घटनामा परी ४९ जनाले ज्यान गुमाएका छन् । ज्यान गुमाउनेमा ३५ पुरुष, १२ महिला र दुई नाबालक छन् । पृथ्वी राजमार्गको कोत्रेदेखि मुग्लिनसम्म धेरै दुर्घटना हुने गरेका छन् । जसमा अधिकांश मोटरसाइकल दुर्घटनामा परेका जिल्ला प्रहरी कार्यालय तनहुँका प्रहरी नायब उपरीक्षक युवराज खड्काले जानकारी दिए ।
ओभर स्पिड, ओभरटेकलगायतका कारण धेरैजसो दुईपांग्रे सवारीसाधन दुर्घटनामा परेको उनले बताए । ‘चालकको लापरवाही, मापसे गरी सवारी चलाउँदा पनि केही दुर्घटना भएका छन्,’ खड्काले भने । धेरैजसो मोटरसाइकल अन्य सवारीमा ठोक्किने गरेको प्रहरीको तथ्यांकले देखाएको छ । दुईपांग्रे सवारीसाधन चलाउने सचेत नभए डरलाग्दो अवस्था सिर्जना हुने उनको भनाइ छ । तीव्र स्पिडका कारण विपरीत दिशाबाट आएको सवारीसाधनमा ठोक्किँदा मोटरसाइकलचालकको मृत्यु हुने गरेको खड्काले बताए । साँघुरा सडक, सवारीको चाप, खाल्डाखुल्डीलगायतले पनि दुर्घटना निम्त्याएको छ ।
मोटरसाइकल दुर्घटनामा ज्यान गुमाउने २८ जना
चालू आर्थिक वर्षमा तनहुँमा मोटरसाइकल दुर्घटनामा परेर २८ जनाको मृत्यु भएको छ । मृत्यु हुने अधिकांशको लाइसेन्स नभएको प्रहरी नायब उपरीक्षक खड्काले बताए । ‘यस वर्ष ४९ जनाले सवारी दुर्घटनामा परी ज्यान गुमाए । तीमध्ये २८ जना मोटरसाइकलसँग सम्बन्धित छन्,’ उनले भने, ‘पछिल्लो समय प्रहरीले समय–समयमा चेकजाँच गर्ने तथा सचेतनामूलक कार्यक्रम पनि गरेको छ । तर, प्रहरीले मात्रै चाहेर हुँदैन । दुर्घटना हुन नदिन चालक नै सचेत हुन आवश्यक छ ।’
दुर्घटना बढ्न थालेपछि ट्राफिक प्रहरीले चेकजाँचमा कडाइ गरेको छ । दमौली, दुलेगौडा, खैरेनीटार, डुम्रेलगायतका बजार क्षेत्रमा प्रहरीले चेकजाँचलाई तीव्रता दिएको हो । गत वर्ष सवारी दुर्घटनामा ४८ जनाको मृत्यु भएको जिल्ला ट्राफिक कार्यालय तनहुँका प्रमुख गोकर्ण नेपालले बताए । ‘साँघुरा सडक, सवारीको चापले भन्दा पनि चालकको लापरवाही तथा ओभर स्पिडका कारण दुर्घटना भएका हुन्,’ उनले भने ।
