बढ्दो हवाई चाप व्यवस्थापन गर्न भन्दै तराईका सात विमानस्थल राति १२ बजेसम्म सञ्चालन गर्ने नागरिक उड्डयन प्राधिकरणको निर्णयविरुद्ध वायुसेवा कम्पनीहरू विरोधमा उत्रिएपछि रात्रिकालीन उडानतालिका बनाउन ११ सदस्यीय कार्यदल गठन गरिएको छ । शुक्रबार पर्यटन मन्त्रालयमा भएको छलफलमा वायुसेवा कम्पनीका प्रतिनिधिलाई समेटेर प्राधिकरणका उपमहानिर्देशक देवचन्द्रलाल कर्णको संयोजकत्वमा कार्यदल गठन गरिएको हो । यो कार्यदलले रात्रिकालीन उडानतालिकाबारे अध्ययन गरी २१ गतेसम्म प्रतिवेदन बुझाउने बताइएको छ ।
पर्यटनमन्त्री प्रेमबहादुर आले, पर्यटन सचिव महेश्वर न्यौपाने, क्यानका महानिर्देशक प्रदीप अधिकारी र वायु सेवा सञ्चालक संघका सदस्यहरू बुद्ध, यती, श्री, सौर्य, गुण एयरलाइन्सबीच शुक्रबार पर्यटन मन्त्रालयमा छलफल भएको थियो । कार्यदलमा ६ जना प्राधिकरण र पाँचजना वायुसेवा कम्पनीका प्रतिनिधि राखिएको छ । यो कार्यदलले बुझाएको प्रतिवेदनका आधारमा नयाँ तालिका २३ वैशाखदेखि लागू हुने संघले जनाएको छ । प्राधिकरणले आफूहरूसँग छलफल नै नगरी एकपक्षीय ढंगले नयाँ स्लट जारी गरेको भन्दै वायुसेवा कम्पनीहरूले शुक्रबारदेखि उडान नगर्ने चेतावनी दिएका थिए । प्राधिकरणले सातवटा विमानस्थलको पुरानो उडानतालिका संशोधन गर्दै बुद्ध, यती, श्री, सौर्य, गुण एयरलाइन्सलाई पत्राचार गरेको थियो ।
त्रिभुवन अन्तर्राष्ट्रिय विमानस्थलमा अत्यधिक हवाई चापका कारण आन्तरिक उडानहरू समयमा हुन नसकी ‘टर्मिनल कन्जेसन’ र ट्राफिक व्यवस्थापनमा समस्या उत्पन्न भएपछि प्राधिकरणले रात्रिकालीन उडान भइरहेका विमानस्थलमा सञ्चालन समय ६ घण्टा बढाएर १८ घण्टा पुर्याएको छ । वायुसेवा कम्पनीहरूले असन्तुष्टि जनाउँदै राति आठ बजेपछि उडान गर्न नसकिने भन्दै बिहीबार सरोकारवाला निकायहरूलाई ध्यानाकर्षण गराएका थिए ।
प्राधिकरण, एटिसी तथा वायुसेवा कम्पनीहरू सम्मिलित कार्यदलले २१ गतेसम्म प्रतिवेदन बुझाउने र सो प्रतिवेदनअनुसार २३ गतेदेखि नयाँ स्लटअनुसार रात्रिकालीन उडान सञ्चालन गर्ने निर्णय भएको संघले जनाएको छ । यो निर्णयको विरोधमा शुक्रबारदेखि स्थगन गर्ने भनिएका सम्पूर्ण उडानहरू सामान्य रूपमै सञ्चालन भए । नयाँ स्लट प्रणाली लागू नगरुन्जेल पहिलेकै स्लटअनुसार नै उडानहरू सञ्चालन हुने संघको भनाइ छ ।
