पञ्चमुखी सरकारलाई एमालेले उछिन्ला भन्ने डर छ : ओली

एकैदिन एमालेको ६१ जिल्ला अधिवेशन उद्घाटन 

एमाले अध्यक्ष केपी ओलीले कांग्रेस सभापति शेरबहादुर देउवा नेतृत्वको पाँचदलीय गठबन्धनको सरकारलाई देश बनाउनेभन्दा पनि एमालेले चुनावमा उछिन्ने चिन्ताले सताएको बताएका छन् । शुक्रबार एमाले काठमाडौंको अधिवेशनलाई सम्बोधन गर्दै ओलीले सरकारको आलोचना गरे । 

‘यो पञ्चमुखी सरकार छ । पाँचतिर टाउका फर्किएका दलहरू मिलेर बनेको, आफ्ना–आफ्ना स्वार्थ बोकेको, देश र जनताभन्दा एमालेले सिध्याउला, उछिन्ला भन्ने डरले देश र जनताको नाम लिनुपरेको छ । तर, जनतालाई थाहा छ– नेकपा एमालेविना यो देश बन्दैन,’ ओलीले भने । 

देशको परिस्थिति अत्यन्त भयावह ढंगले प्रतिगमनको बाटोमा अघि बढेको दाबी गर्दै ओलीले अहिलेको सरकारको ध्यान देश विकासभन्दा पनि मन्त्रालय र सरकारी निकायबीच सेटिङ मिलाएर भ्रष्टाचार गर्ने र एमालेलाई सत्तोसराप गर्नमै केन्द्रित रहेको आरोप लगाए । 

‘देशको राजनीति प्रतिगमनको बाटोमा गइरहेको छ । बैंकहरूमा पैसा छैन, पूर्वाधार विकासका आयोजना अलपत्र परेका छन् । अहिलेको सत्तागठबन्धन अरू होइन, जम्माजम्मी एमालेलाई सरापेर बसेको छ,’ ओलीले भने, ‘सरकारमा गएपछि त देश बनाउनुपर्ने हो । विकास गर्नुपर्ने हो । तर, त्यता ध्यान छैन ।’

ओलीले सरकार काममा होइन, नियुक्त र निष्कासनमा लागेको पनि आरोप लगाए । ‘सरकारमा रहेकाहरू काठमाडौंमा मेलम्चीको पानी पाइपबाट झार्ने होइन, मन्त्रालयपिच्छे, निकायपिच्छे पाइप फिट गरेर आम्दानी कहाँ झार्ने भन्ने ध्यानमा छन्,’ ओलीले भने, ‘मान्छे नियुक्त गर्ने र निष्कासन गर्नेमा ध्यान छ । प्रधानमन्त्री जानुअघि बेलायतको राजदूत निकाले, अहिले १२ देशमा राजदूत छैनन्, सरकार ढुक्क छ ।’

आफ्नो नेतृत्वको सरकारले प्राकृतिक प्रकोपले पुर्याएको क्षतिका बाबजुद अंग्रेजी नयाँ वर्ष २०२२ सम्म काठमाडौंमा मेलम्चीको पानी झार्ने संकल्प पूरा गर्ने तयारी गर्दागर्दै षड्यन्त्रपूर्वक हटाइएको ओलीले दाबी गरे । उनले अहिलेको सरकारले आगामी वैशाखको नयाँ वर्षसम्म पानी ल्याउने घोषणा गरे पनि त्यो अवधिभित्र प्रतिबद्धता पूरा गर्न चुनौती दिए । 

ओलीले माओवादी केन्द्रका अध्यक्ष प्रचण्ड र नेकपा एसका अध्यक्ष माधव नेपालको नाम नलिईकनै व्यंग्य गरे । ‘जो जति कमजोर छ, ऊ त्यति बढ्दा चर्को गरी यो गठबन्धन निर्वाचनसम्मै जानुपर्छ भनेर कराइरहेको छ । तर, एमालेलाई गठबन्धन चाहिएको छैन,’ ओलीले भने, ‘एमाले एक्लै चुनौतीको सामना गर्न सक्षम छ । एमालेलाई कसैले अलग गर्न सक्दैन, कमजोर पार्न सक्दैन ।’

अधिवेशनमा सहमति नभए स्वस्थ प्रतिस्पर्धा गर्न निर्देशन 
ओलीले जिल्ला अधिवेशनहरूमा सकभर सर्वसहमतिमा र त्यस्तो हुन नसके स्वस्थ प्रतिस्पर्धाको माध्यमबाट नेतृत्व चयन गर्न निर्देशन दिए । पार्टीको दशौँ महाधिवेशनमा पनि त्यस्तै अभ्यास गरिएको भन्दै ओलीले लोकतान्त्रिक अभ्यासलाई पनि स्वस्थ रूपमा प्रयोग गर्न सकिने बताए ।

‘हामीले दशौँ महाधिवेशनमा सहमतिको प्रयास गर्यौँ, धेरै ठाउँमा सहमति गर्यौँ । कहीँ–कतै सहमति हुन नसक्दा अत्यन्तै स्वस्थ ढंगले लोकतान्त्रिक अभ्यासको अर्को रूप पनि अपनायौँ । अथवा निर्वाचनको विधिबाट अगाडि बढ्यौँ,’ उनले भने, ‘आज पनि सबै साथीहरूलाई सकेसम्म समझदारी, सहमति र एकताबद्ध भएर मन नखुम्च्याईकन सहमतिमा पुुग्न, नेतृत्व निर्माण गर्न आग्रह गर्दछु । कथं त्यस्तो भएन भने स्वस्थ प्रतिस्पर्धामा जान आग्रह गर्छु ।’

६१ जिल्लामा अधिवेशन उद्घाटन 
एमालेले शुक्रबार एकैदिन ६१ वटा जिल्लामा जिल्ला कमिटीहरूको अधिवेशन उद्घाटन गरेको छ । २ नम्बर प्रदेशका सप्तरीबाहेकका सात जिल्ला, रोल्पासहित केही हिमाली जिल्लाहरूमा भने अधिवेशन बाँकी छ । २ नम्बर प्रदेशका जिल्लामा पार्टी सदस्यतासम्बन्धी विवादको समाधान भइनसकेको, रोल्पामा पार्टी सचिवको निधन भएको तथा सोलुखुम्बुसहितका धेरैजसो हिमाली जिल्लामा तत्काल अधिवेशन सम्भव नभएकाले केही दिनपछि अर्को मिति तय हुने पार्टी कार्यालय सचिव भीष्म अधिकारीले जानकारी दिए ।

‘राष्ट्रिय सभा निर्वाचन परिणाम हाम्रा लागि प्रतिकूल आउन सक्छ’
एमाले अध्यक्ष केपी ओलीले राष्ट्रिय सभाको निर्वाचनको परिणाम एमालेका लागि प्रतिकूल हुन सक्ने बताएका छन् । पाँच दलको गठबन्धनले एमालेमाथि अन्तिम किस्तामा प्रहार गर्ने तयारी गरिरहेकाले निर्वाचनलाई अस्वाभाविक रूपमा नलिने ओलीको भनाइ छ । 

‘राष्ट्रिय सभाको निर्वाचनमा सकारात्मक परिणाम आएन भनेर कुनै अन्यथा मान्नुपर्ने कारण छैन, किनभने यो पहिलेको जनमत हो, एमालेमाथि प्रहारको अन्तिम किस्ता हो,’ ओलीले भने, ‘१२ गतेको परिणाम हाम्रा लागि प्रतिकूल आउन सक्छ, किनभने त्यो आजको जनमत र कुनै यथार्थ जनमत होेइन । आजभन्दा चार वर्षअघि विभिन्न प्रवृत्ति व्यवस्थापन गर्न सिट बाँडेका थियौँ ।’

ओलीले राष्ट्रिय सभा चुनाव हिजोको जनादेशबाट हुन लागेकाले यसबाट नआत्तिन कार्यकर्तालाई आग्रह पनि गरे । ‘दुईजना मान्छे तलमाथि पार्दा हाम्रो मान्छे हार्छ,’ ओलीले भने, ‘तर, अहिले पनि हामी अरू पार्टीभन्दा एक्लै मजबुत छौँ, बलियो छौँ । हिजोको जनमत दुरुपयोग गरेर राष्ट्रिय सभाको परिणाम आउन सक्छ ।