दुई खेलमा लगातार समान ३–० को जितसँगै इटाली युरो २०२० को प्रिक्वार्टरफाइनलमा पुग्ने पहिलो टोली मात्रै बनेन आफूलाई उपाधिको बलियो दाबेदारका रूपमा समेत प्रस्तुत गरेको छ
युरोकप २०२० को प्रिक्वार्टरफाइनलमा पुग्ने इटाली पहिलो टोली बनेको छ । बुधबार राति भएको खेलमा स्विट्जरल्यान्डविरुद्ध ३–० गोलको प्रभावशाली जित हात पार्दै इटालीले प्रतियोगिताको नकआउट चरणको यात्रा निश्चित गरेको हो ।
प्रतियोगितामा रोबर्टाे मान्सिनीको टोलीले आफ्नो पहिलो खेलमा टर्कीविरुद्ध पनि ३–० कै जित हात पारेको थियो । दुई खेलबाट दुई जितसहित ६ अंक बनाएको इटाली समूह ‘ए’को शीर्ष स्थानमा छ ।
रोमस्थित घरेलु मैदानमा भएको खेलमा इटालीलाई यो महत्वपूर्ण जित दिलाउन सास्सोलोका मिडफिल्डर मान्युइल लोकाटेल्लीले दुई गोल गरे । अर्काे गोल लाजियोका स्ट्राइकर सिरो इमोबिलले थपे ।
इटालीको पासिङ र ‘प्रेसिङ’ स्विट्जरल्यान्डको तुलनामा निकै सशक्त थियो । त्यही दबाबमा इटाली लगातार दोस्रो प्रभावशाली जित निकाल्न सफल भयो । स्विट्जरल्यान्डले भने इटालीको पोस्टमा विरलै आक्रमण गर्न सकेको थियो ।
सुरुवाती दुई खेलको प्रदर्शनबाट इटालीलाई उपाधिको प्रमुख दाबेदार टोलीका रूपमा हेर्न थालिएको छ । इटालीले लामो समयदेखि सशक्त प्रदर्शन गर्दै आइरहेको छ । इटालीले पछिल्ला १० प्रतिस्पर्धात्मक खेलमा गोल व्यहोरेको छैन । अर्थात् पछिल्लो एक हजार मिनेटसम्म इटालीलाई कुनै पनि टोलीले गोल गर्न सकेको छैन । यस्तै, इटाली आफ्नो पछिल्लो २९ खेलमा अपराजित छ ।
इटालीको बलियो रक्षापंक्ति र सशक्त आक्रमणमा स्विट्जरल्यान्ड निरिह देखिएको थियो । यही प्रदर्शनलाई आधार मान्ने हो भने प्रतियोगिताअघि बढ्दै जाँदा इटालीले आफूलाई थप परिस्कृत गर्ने देखिएको छ ।
यो प्रतियोगिताभन्दा पहिले इटालीले युरोकपको एकै खेलमा तीनभन्दा बढी गोल गरेको थिएन । यद्यपि, जारी प्रतियोगिताको सुरुवाती दुई खेलमै इटालीले तीन गोलको अन्तरले जित हात पारेको छ । जितका बाबजुद इटालीका लागि यो खेलबाट एउटा खराब समाचार पनि पाएको छ । इटालीका मुख्य रक्षक एवं कप्तान जियोर्जियो चिलेनी चोटग्रस्त बनेका छन् । उनलाई ह्यामस्ट्रिङ भएको अनुमान गरिएको छ । स्विट्जरल्यान्डविरुद्ध उनले पनि गोल गरेका थिए, यद्यपि भार (भिडियो असिस्टेन्ट रेफ्री)ले गोल गर्नु पहिले उनले हातले बल छोएको देखाएको थियो ।
त्यसपछि खेलको २६औँ मिनेटमा लोकाटेल्लीले इटालीलाई अगाडि बढाएका थिए । उनले आफैँले सुरुवात गरेको एउटा सुन्दर ‘मुभ’मा डोमेनिको बेरार्डीले दिएको ‘कटब्याक’ पासलाई टेप इनमा गोल गरेका थिए । पहिलो हाफमा इटाली १–० ले अगाडि रह्यो ।
खेलको ५२औँ मिनेटमा निकोलो बारेल्लाको सहयोगमा गोल गर्दै लोकाटेल्लीले इटालीको अग्रता दोब्बर बनाए । त्यसपछि खेलको अन्त्यतिर अर्थात् ८९औँ मिनेटमा इमोबिलले गोल गर्दै घरेलु टोलीको जित ३–० ले निश्चित गरेका हुन् ।
खेलमा स्विट्जरल्यान्डले एउटै मात्र राम्रो अवसर पायो, जसमा परिवर्तित खेलाडी स्टेभेन जुबेरको प्रहारलाई इटालीका गोलरक्षक जियनलुइजी डोन्नारुम्माले सहज नियन्त्रणमा लिएका थिए । अघिल्लो खेलमा वेल्ससँग बराबरी खेलेको स्विट्जरल्यान्ड दुई खेलबाट एक अंक जोड्दै समूहको तेस्रो स्थानमा रहेको छ । बुधबार त्यसअघि भएको खेलमा टर्कीलाई पराजित गरेको वेल्स दुई अंकबाट चार अंक जोड्दै दोस्रो स्थानमा छ । टर्की अंकविहीन छ ।
युक्रेनको पहिलो जित
एजेन्सी÷ युक्रेनले युरोकप २०२० मा पहिलो जित हात पारेको छ । समूह ‘सी’अन्तर्गत बिहीबार साँझ बुचरेस्टमा भएको खेलमा युक्रेनले पहिलोपटक युरोकप खेलिरहेको नर्थ म्यासेडोनियालाई २–१ गोलले पराजित गरेको हो ।
जितसँगै युक्रेनले दुई खेलबाट तीन अंक जोडेको छ । यो जितपछि युक्रेनले समूह सीबाट नकआउट चरण प्रवेश गर्ने सम्भावनालाई जीवितै राखेको छ । युक्रेन आफ्नो पहिलो खेलमा नेदरल्यान्ड्ससँग ३–२ ले पराजित भएको थियो ।
एन्ड्री सेभचेन्कोको टोली युक्रेनले युरोकपमा लगातार ६ खेलको पराजयपछि पहिलो जित हात पारेको हो । युक्रेनलाई खेलको २८औँ मिनेटमा कप्तान एन्ड्री यार्माेलेन्कोले १–० ले अघि बढाएका थिए । कर्नरमार्फत आएको बललाई म्यासेडोनियाको कमजोर रक्षापंक्तिको फाइदा उदाउँदै कप्तान एन्ड्रीले हेडिङ गोल गरेका थिए ।
युक्रेनले त्यसको पाँच मिनेटपछि उनै कप्तान एन्ड्रीको सहयोगमा अग्रता दोब्बर बनायो । वेस्ट हामका फर्वाड एन्ड्रीले उपलब्ध गराएको बललाई रोमन यारेम्चुकले गोलमा परिणत गराएका थिए ।
खेलको ५७औँ मिनेटमा पेनाल्टी अवसर सदुपयोग गर्दै इक्जान एलिवस्कीले म्यासेडोनियाका लागि एक गोल फर्काए । यद्यपि, त्यसपछिको समयमा अरू गोल थप्न नसक्दा म्यासेडोनिया पराजय टार्न असफल रह्यो । खेलको अन्त्यतिर युक्रेनका रुस्लान मालिनोभ्स्कीले प्रहार गरेको पेनाल्टी प्रहारलाई असफल बनाउँदै गोलरक्षक स्टोल दिमित्रिइभ्स्कीले म्यासेडोनियाको फराकिलो हार टारेका थिए ।
