नेकपाभित्र विवाद चुलिएका बेला ताप्लेजुङका जनताले पार्टी फुटाएर नेता गाउँ आए ‘सिरुपाते खुकुरी लिएर खेद्ने’ चेतावनी दिएका छन् ।
ताप्लेजुङको मिक्वाखोला– ३ लिबाङका जनताले नेकपाका शीर्ष नेतृत्वलाई पार्टी नफुटाउन कडा निर्देशन दिएका छन् ।
गृहजिल्ला गएका संस्कृति, पर्यटन तथा नागरिक उड्यनमन्त्री योगश भट्टराईसमक्ष लिबाङका स्थानीयले यस्ताे चेतावनी दिएका हुन् ।
मन्त्रीले सम्बाेधन गर्ने कार्यक्रममा उपस्थित लिबाङका बलनाथ लिबाङले केन्द्रमा पार्टी फुटाएर गाउँमा भोट माग्दै आए सिरुपाते खुकुरी लिएर खेद्ने बताए ।
‘नेता सही भए मात्र देश सही दिशामा जाने’ बताउँदै बलनाथले मन्त्री भट्टराईमार्फत प्रधानमन्त्री ओलीलाई पार्टी जोगाएर देशलाई सही दिशामा लैजान सन्देश पठाए ।
पूर्वनेकपा (एमाले)का क्षेत्रीय सदस्यसमेत रहेका बलनाथले मन्त्री भट्टराईलाई आग्रह गर्दै भने, ‘नेकपाका तीन नेता केपी ओली, पुष्पकमल दाहाल (प्रचण्ड) र माधवकुमार नेपाललाई पार्टी जोगाउने यो मेरो सन्देश सुनाइदिनू ।’ उनको सन्देश पनि मन्त्री भट्टराईले तीन नेतालाई आफूले यो सन्देश दिने वचन दिए ।
अर्का ७४ वर्षीय वृद्ध नारायण लिम्बूले आफू पनि पञ्चायतकालमा जेल बसेको स्मरण गर्दै पार्टी विभाजन भए देशमा ठूलो दुर्घटना हुने चिन्ता व्यक्त गरे ।
लिम्बूले भने, ‘म अहिलेका प्रधानमन्त्री केपी ओलीसँगै जेल बसेको हुँ । उहाँलाई मेराे विनम्र अनुरोध छ, जसरी हुन्छ पार्टी जोगाउनुस्, देश बचाउनुस् ।’
मन्त्री भट्टराई २१ कात्तिकदेखि एक हप्ताका लागि गृहजिल्लामा छन् ।
