जर्मनीका भेट्रान्स गोलरक्षक म्यानुएल नुएरले दोस्रोपटक अन्तर्राष्ट्रिय फुटबल प्रतियोगिताबाट सन्न्यास घोषणा गरेका छन् । चालू विश्वकपको नकआउट चरणअन्तर्गत पाराग्वेसँग पेनाल्टी सुटमा पराजित भएपछि गोलरक्षक नुएरले सन्न्यास लिएका हुन् । सन् २०२४ को युरोमा स्पेनसँग क्वार्टरफाइनलमा पराजित हुँदा पनि उनले सन्न्यास लिएका थिए । जर्मन प्रशिक्षकको आग्रहमा उनले सन्न्यास फिर्ता लिँदै विश्वकप टोलीमा सहभागिता जनाएका हुन् ।
विश्वकप अगाडि नै उनले आफ्नो अन्तिमपटक राष्ट्रिय टोलीबाट प्रतिस्पर्धा गर्ने बताइसकेका थिए । सन् २०१४ मा जर्मनीले विश्वकप ट्रफी उचाल्दा उनी टोलीका कप्तान थिए । जर्मनीलाई चौथोपटक विश्व च्याम्पियन बनाउँदा उनले उत्कृष्ट प्रदर्शन गरेका थिए । यसपटक जर्मनीलाई पाँचौँपटक विश्वकप दिलाउने नुएरको वाचा पूरा भएन ।
‘राष्ट्रिय टोलीबाट योभन्दा अझ राम्रो हुन सक्थ्यो,’ नुएरले भने, ‘हामीले नसोचेको नतिजा निकाल्यौँ । अब जर्मनी टोलीसँगको यात्रा यहीसम्म हो ।’ ४० वर्षीय नुएरले चालू विश्वकपमा सात उत्कृष्ट बचाउ गरेका थिए । नुएरको सन्न्याससँगै जर्मन फुटबल इतिहासमा एक युगको समाप्ति भएको संज्ञा दिइएको छ । ‘जर्मनका महान् गोलरक्षक नुएरले सन्न्यास लिएका छन्,’ जर्मनीको ब्रोडकास्ट एआरडीले भनेको छ, ‘हामीले उहाँसँग सन्न्यासबारे सोधेका थियौँ । विश्वकप नै अन्तिम भएको बताइएको छ ।’ पाराग्वेविरुद्धको पेनाल्टी सुटमा उनले फावियनको प्रहार छेकेका थिए । उनले आफ्नो अनुभव प्रयोग गर्दै जर्मनीलार्ई प्रिक्वार्टरफाइनलमा पुर्याउने छनक देखाए । तर, जर्मन खेलाडीले असफल प्रहार गर्दा उनको पाँचौँपटक विश्वकप उपाधि जित्ने इच्छा अधुरो भयो ।
गोल्डेन ग्लोब्स विजेता
सन् २०१४ मा ब्राजिलले आयोजना गरेको विश्वकपमा उनी करिअरकै उत्कृष्ट फर्ममा थिए । अर्जेन्टिनाविरुद्धको फाइनलमा उनले क्लिन सिट राखेका थिए । उनकै प्रेरणादायी प्रदर्शनको सहयोगमा जर्मनीले अर्जेन्टिनालाई १–० ले हराउँदै विश्वकप उपाधि जितेको थियो । विश्वकपमा गोलकिपिङ भूमिमा असाधारण प्रदर्शन गरेका कारण उनी सो प्रतियोगिताकै गोल्डेन ग्लोब्सबाट सम्मानित भए । सन् २०१८ र २०२२ को विश्वकपको पहिलो चरणबाटै बाहिरिएको जर्मनीले यसपटक बलियो टोली बनाएको थियो ।
अघिल्लो दुई संस्करणमा टोलीले समूह चरण पार गर्न नसक्दा नुएरले नै गोलकिपिङ भूमिका संहालेका थिए । १२ वर्षपछि विश्वकपको नकआउट चरणमा पुगेको जर्मनीको यात्रा यहीँसम्म रह्यो । जर्मनीको फुटबल इतिहासमा ओलिभर कानपछि उत्कृष्ट गोलरक्षकका रूपमा नुएरलाई लिने गरिन्छ । सन् २००९ मा उनले जर्मनीबाट राष्ट्रिय टोलीमा डेब्यु गरेका थिए । उनले अहिलेसम्म १२८ अन्तर्राष्ट्रिय खेलमा ५० पटक क्लिन सिट राखेका छन् ।
प्रशिक्षकले विश्वास गरेका गोलरक्षक
जर्मन प्रशिक्षकहरूको पहिलो रोजाइमा नुएर परिरहेका थिए । सन् २०१४ मा जर्मनीलाई विश्वकप दिलाएका प्रशिक्षक जोखिम लोउ र वर्तमान प्रशिक्षक जुलियन नग्लिसम्यानले उनलाई पहिलो रोजाइका गोलरक्षक रूपमा राखे । यद्यपि, वर्तमान जर्मनीको टोलीमा उत्कृष्ट फर्ममा रहेका गोलरक्षक थिए । तर, विश्वकपजस्तो प्रतियोगितामा अनुभवी खेलाडीको आवश्यकता महसुस गर्दै जुलियनले नुएरलाई गोलकिपिङको जिम्मेवारी दिए । जुलियनकै आग्रहमा उनी विश्वकप टोलीमा सहभागी भएका हुन् । अन्तर्राष्ट्रिय फुटबलबाट सन्न्यास लिए पनि नुएरले बुन्डेस क्लब बायर्न म्युनिखबाट व्यावसायिक करिअर अगाडि बढाउनेछन् । विश्वकपको इतिहासमा नुएरलाई पनि उत्कृष्ट गोलरक्षकको पंक्तिमा राखिएको छ ।
