रास्वपा बागमती अधिवेशन : पाँच मत खसेपछि मतदान स्थगित

राष्ट्रिय स्वतन्त्र पार्टी (रास्वपा) बागमती प्रदेशको प्रथम अधिवेशनअन्तर्गत सुरु भएको निर्वाचन प्रक्रिया मतदान सुरु भएको करिब आधा घण्टामै विवादमा तानिएको छ । राति अबेर सुरु भएको मतदान पाँचजनाले मत खसालेपछि स्थगित गरिएको छ भने बुधबार बिहानसम्म पनि निर्वाचन प्रक्रिया पुनः सुरु हुन सकेको छैन ।

हेटौँडा– १ स्थित हिमालयन दरबारमा जारी अधिवेशनअन्तर्गत मंगलबार राति करिब १:३० बजे मतदान सुरु गरिएको थियो । निर्वाचन समितिले यसअघि मतदाताको अन्तिम नामावली प्रकाशन गरी सभापति र प्रदेश सदस्य पदका लागि मतदान प्रक्रिया अघि बढाएको थियो । तर, मतदान सुरु भएको केही समयमै मतदाता नामावली र उम्मेदवारको विवरणसम्बन्धी विषयमा विवाद उत्पन्न भएपछि निर्वाचन स्थगित गर्नुपरेको हो ।

निर्वाचन समितिका अनुसार मतदान सुरु भएपछि करिब पाँचजनाले मात्रै मत खसालेका थिए । त्यसपछि प्रतिनिधिहरूले मतदाता नामावली र उम्मेदवारको सूचीसम्बन्धी विषय उठाउँदै आपत्ति जनाएपछि प्रक्रिया रोकिएको हो ।

अधिवेशनमा सहभागी प्रतिनिधिहरूका अनुसार भक्तपुर जिल्लासम्बन्धी मतदाता नामावली तथा उम्मेदवारहरूको विवरण स्पष्ट रूपमा सार्वजनिक नगरिएको विषयलाई लिएर विवाद सुरु भएको हाे । निर्वाचन क्षेत्र र क्लस्टरअनुसार उम्मेदवारहरूको नामावलीमा त्रुटि रहेको दाबी गर्दै केही प्रतिनिधिहरूले निर्वाचन समितिको ध्यानाकर्षण गराएका थिए ।

विवाद चर्किएसँगै अधिवेशनस्थलमा नाराबाजीसमेत भएको थियो । आक्रोशित कार्यकर्ता तथा प्रतिनिधिहरूले निर्वाचन प्रक्रियाप्रति असन्तुष्टि जनाउँदै होहल्ला गरेका थिए । केही मतपत्र च्यातिएको आरोपसमेत सहभागीहरूले लगाएका छन् ।

स्थिति तनावपूर्ण बनेपछि निर्वाचन समितिले बुधबार बिहान ८ बजेसम्मका लागि मतदान कार्यक्रम स्थगित गरेको घोषणा गरेको थियो । त्यसपछि समितिका पदाधिकारीहरू अधिवेशनस्थलबाट बाहिरिएका थिए ।

तर, बुधबार बिहानसम्म पनि निर्वाचन प्रक्रिया पुनः सञ्चालन हुन नसकेको सहभागीहरूले बताएका छन् । अधिवेशनस्थलमा आयोजक समिति तथा निर्वाचन समितिका अधिकांश पदाधिकारी अनुपस्थित रहेको भन्दै प्रतिनिधिहरूले असन्तुष्टि व्यक्त गरेका छन् ।

अधिवेशनमा सहभागी केही प्रतिनिधिहरूले व्यवस्थापन पक्षको कमजोरीका कारण निर्वाचन प्रक्रिया प्रभावित भएको आरोप लगाएका छन् । उनीहरूले निर्वाचनसम्बन्धी तयारी पर्याप्त नहुँदा रातभर अधिवेशनस्थलमै बस्नुपरेको गुनासो गरेका छन् ।

अधिवेशनबाट ६५ सदस्यीय प्रदेश कार्यसमिति चयन गरिने

रास्वपाको बागमती प्रदेश अधिवेशनबाट ६५ सदस्यीय प्रदेश कार्यसमिति चयन गरिनेछ । सभापति पदका लागि चारजना उम्मेदवार चुनावी मैदानमा छन् भने सदस्य पदका लागि ८८ जनाले उम्मेदवारी दिएका छन् ।

सभापति पदमा नुवाकोटका डा. अच्युतम लामिछाने, मकवानपुरका उत्सव अर्याल, धादिङका कृष्णमान श्रेष्ठ र रामेछापका हरिबहादुर (एचबी) खत्री प्रतिस्पर्धामा छन् । प्रारम्भिक रूपमा पाँचजनाले उम्मेदवारी दर्ता गराए पनि काभ्रेका प्रतिनिधिसभा सदस्य बदन भण्डारीले उम्मेदवारी फिर्ता लिएपछि चारजनाबिच प्रतिस्पर्धा हुने भएको हो ।

निर्वाचन प्रक्रिया अवरुद्ध भएपछि अधिवेशनको कार्यतालिका प्रभावित बनेको छ । विवाद समाधान गरी मतदान पुनः सञ्चालन गर्ने विषयमा पार्टी नेतृत्व, आयोजक समिति र निर्वाचन समितिबिच छलफल जारी छ ।

रास्वपाले प्रदेशस्तरीय अधिवेशनको सुरुवात बागमतीबाट गरेको हो । प्रदेशका १३ जिल्लाबाट सहभागी प्रतिनिधिहरू नयाँ नेतृत्व चयन गर्ने उद्देश्यसहित हेटौँडामा भेला भएका छन् ।