विराट गोल्डकप फुटबल प्रतियोगिताको उद्घाटन खेलमा विभागीय टोली त्रिभुवन आर्मी क्लबलाई २–१ ले पराजित गर्दै झापा– ११ सेमिफाइनलमा प्रवेश गरेको छ । शनिबार विराटनगरस्थित सहिद रंगशालामा भएको रात्रिकालीन प्रतिस्पर्धामा विभागीय टोलीविरुद्ध मोफसलको टिम हाबी भएको हो ।
झापाको जितमा स्ट्राइकर फागुराम थारूले दुई गोल गरे । राष्ट्रिय लिगमा प्लानिङ ब्बाइजका लागि खेलेका उनी नै खेलको प्लेयरअफ द म्याच घोषित हुँदै नगद ११ हजार रुपैयाँ प्राप्त गरे । आर्मीका लागि नवीन लामाले एक गोल फर्काएका थिए ।
अब, आइतबारको खेल ’ए’ डिभिजन लिग विजेता चर्च ब्वाइज युनाइटेड र विभागीय टोली एपीएफ क्लबबिच हुनेछ । प्रतियोगिताको उद्घाटन कोशी प्रदेशका पर्यटन, वन तथा वातावरण मन्त्री भीम पराजुलीले गरेका थिए । वैशाख ५ गतेसम्म चल्ने प्रतियोगितामा नेपाल र भारतका प्रतिष्ठित क्लब गरी ८ टिमको सहभागिता छ । विराट गोल्डकप ट्रस्टका अध्यक्ष किशोरबहादुर शाहीका अनुसार प्रतियोगिताको विजेताले ११ लाख र उपविजेताले पाँच लाख रुपैयाँ नगद पुरस्कार पाउनेछन् । त्यस्तै, सर्वोत्कृष्ट खेलाडीलाई ५१ हजार र अन्य विधागत उत्कृष्टलाई १५–१५ हजार रुपैयाँ पुरस्कार प्रदान गरिनेछ ।
फागुरामको दुई गोल
झापाको जितमा युवा स्ट्राइकर फागुरामले दुई गोल गरे । उनले दुबै गोल पहिलो हाफमा गरेका हुन् । फागुरामले खेलको दशौँ मिनेटमा अप्रत्याशित रूपमा झापालाई अग्रता दिलाएका थिए । अनुप तामाङले मिलाइदिएको पासलाई सदुपयोग गर्दै फागुरामले आकर्षक गोल गरेका थिए ।
तर, २३औँ मिनेटमा नवीन लामाले गोल गर्दै खेल बराबरीमा ल्याएका थिए । नवीनले गौरव महर्जनको पासमा सदुपयोग गरेका थिए । ४४औँ मिनेटमा फागुरामले पुनः दोस्रो गोल गर्दै जित सुनिश्चित गरेका हुन् । यसपटक फागुरामलाई राजेश दाहालले गोलको अवसर बनाइदिएका थिए । बाँकी समय आर्मीले खेलमा दबाब बनाएपछि फाइनल थर्डमा चुकेको थियो ।
झन्डै ११ वर्षपछि सोही मैदानमा आमनेसामने भएका यी दुई टोलीबिचको भिडन्त निकै प्रतिस्पर्धात्मक थियो । विसं २०७१ सालको विराट गोल्डकप फाइनलमा पनि झापाले आर्मीलाई नै हराएर उपाधि जितेको थियो । शनिबारको नतिजासँगै झापाले पुरानो इतिहास मात्र दोहोर्याएन, आर्मीलाई प्रतियोगिताबाट घर फर्काइदिएको छ ।
प्रतिस्पर्धात्मक खेल
पहिलो हाफमै झापाले अग्रता बनाए पनि दोस्रो हाफमा आर्मीले खेल बराबरी गर्ने थुप्रै अवसर गुमायो । आर्मीले आधा दर्जनभन्दा बढी चर्चित खेलाडी समावेश गरेर प्रतियोगिता खेल्न गएको थियो । तर, उपाधि दाबेदार मानिएको आर्मी पहिलो खेलबाटै बाहिरिएको छ । ७६औँ मिनेटमा भरत खवासको पासमा कप्तान जिलेस्पीजंग कार्कीको प्रहार झापाका रक्षक योगेश गुरुङले गोललाइनबाट क्लियर गरिदिए । लगत्तै ७८औँ मिनेटमा गौरव महर्जनको सशक्त प्रहार पोस्टको थोरै माथिबाट बाहिरियो । झापाका तर्फबाट विदेशी खेलाडी सोलमन र राजेश दाहालको प्रहारलाई आर्मीका गोलरक्षक विकेश कुथुले उत्कृष्ट बचाउ गर्दै अन्तर बढ्न दिएका थिएनन् ।
