- १६ वर्षीया इनिसा विक पोस्टमार्टम रिपोर्ट र पक्राउ परेकाको बयानलाई आधार मान्दा जबर्जस्ती करणीपछि अत्यधिक रक्तस्रावले मृत्यु भएको पुष्टि : प्रहरी
सुर्खेत वीरेन्द्रनगरकी १६ वर्षीया इनिसा विकको बलात्कारपछि भएको अत्यधिक रक्तस्रावका कारण ज्यान गएको पुष्टि भएको छ । यौनांगमा गहिरो चोट देखिएको र अत्यधिक रक्तस्रावका कारण मृत्यु भएको तथ्य शवको पोस्टमार्टम रिपोर्टले देखाएको हो ।
भेरी अस्पताल नेपालगन्जबाट फरेन्सिक विशेषज्ञ टोली सुर्खेत आएर पोस्टमार्टम गरेको थियो । टोलीले बुझाएको प्रारम्भिक रिपोर्टमा इनिसाको यौनांगको भित्री भाग च्यातिएर अत्यधिक रक्तस्राव भएको उल्लेख छ ।
‘मृतक किशोरीको यौनांगको बाहिरी र भित्री भाग च्यातिएको छ । ढाडमा घस्रिएर चोटपटक लागेको देखियो,’ भेरि अस्पतालका फोरेन्सिक विशेषज्ञ डा. अर्विन शाक्यले भने, ‘यौनांगमा भएको गहिरो चोटका कारण अत्यधिक रक्तस्राव भएको र त्यही कारण उनको मृत्यु भएको देखिन्छ ।’
सुर्खेतको गुर्भाकोट नगरपालिका– ६, बडाखोली स्थायी घर भई वीरेन्द्रनगर– १ बस्दै आएकी इनिसा २३ फागुनमा वीरेन्द्रनगर– ४ स्थित सामुदायिक वनमा बेहोस अवस्थामा फेला परेकी थिइन् । लगत्तै उनलाई प्रादेशिक अस्पताल कालागाउँमा पुर्याइएकोमा डाक्टरले मृत घोषणा गरेका थिए । वीरेन्द्रनगरकै उषा बालबाटिका स्कुलमा कक्षा ११ मा पढ्ने इनिसा बिहान ६ बजे ट्युसन पढ्न जाने भनेर घरबाट निस्किएकी थिइन् ।
जिप्रका सुर्खेतका अनुसार घटनामा संलग्न १६ वर्षीय एक किशोर घटना भएकै दिन पक्राउ परेका थिए । त्यसको भोलिपल्ट इनिसाको परिवारले सामूहिक बलात्कार भएको भन्दै अन्य तीन किशोरविरुद्ध पनि जाहेरी दिएपछि १५, १६ र १७ वर्षका उनीहरू पक्राउ परेका छन् । जिल्ला प्रहरी परिसर सुर्खेतका प्रमुख एसपी सुधीर शाहीले पनि पक्राउ परेकाको बयान र पोस्टमार्टम रिपोर्टलाई आधार मान्दा जबर्जस्ती करणी पुष्टि भएको बताए । भिसेरा परीक्षणका लागि रगत र स्वाब संकलन गरिएकाले त्यसबाट थप प्रमाण खुल्ने उनको भनाइ छ ।
‘किशोरीको शवको पोस्टमार्टम रिपोर्ट आएको छ । उनको यौनांगमा गहिरो चोट भएको देखियो । यौनांगबाट अत्यधिक रक्तस्राव हुँदा मृत्यु भएको पोस्टमार्टम रिपोर्टले देखाएको छ,’ जिल्ला प्रहरी परिसर सुर्खेतका प्रमुख एसपी सुधीर शाहीले भने, ‘भिसेरा परीक्षणका लागि पनि रगत र स्वाब संकलन गरिएको छ, त्यसबाट थप प्रमाण खुल्ला ।’
ट्युसन पढेर बिहान ९ बजे घर फर्किने इनिसा त्यस दिन अबेरसम्म पनि नआएपछि परिवारका सदस्यले फोन गरेका थिए । तर, उनको मोबाइल स्विच्ड अफ थियो । त्यसपछि खोजी सुरु भएको थियो । त्यसैक्रममा कोही अपरिचितले इनिसाकी आमालाई फोन गरेर ‘छोरी जंगलमा अचेत अवस्थामा रहेको’ जानकारी गराएका थिए । त्यसलगत्तै परिवारका सदस्य घटनास्थल पुगेर इनिसालाई अस्पताल लगेका थिए । तर, चिकित्सकले मृत घोषणा गरेका थिए ।
चार किशोरलाई पक्राउ गरिएकामा पीडित परिवारले अन्य पनि संलग्न हुन सक्ने भन्दै जाहेरी दिएका छन् । प्रहरीले त्यसतर्फ पनि अनुसन्धान गरिरहेको एसपी शाहीले बताए । ‘परिवारका सदस्यले घटनामा अन्य पनि संलग्न हुन सक्ने भन्दै जाहेरी दिएका छन् । त्यसतर्फ हामी चनाखोपूर्वक अनुसन्धान गरिरहेका छौँ । अझै केही प्राविधिक तथ्य, अनुसन्धान गर्न बाँकी नै छ,’ उनले भने, ‘फरेन्सिक ल्याबमा पीडित र पीडक परिवारको मोबाइललगायत विद्युतीय सामग्रीहरू अनुसन्धानका लागि पठाइएकोमा रिपोर्ट आउन बाँकी छ ।’
इनिसाका बुबा ४० वर्षीय इन्द्रबहादुर विक वैदेशिक रोजगारीमा थिए । छोरीको मृत्युको खबरपछि उनी घर फर्किएका छन् । उनले पोस्टमार्टम रिपोर्ट आए पनि दोषीलाई कारबाही नगरेसम्म शव नबुझ्ने बताएका छन् । इनिसाको शव प्रादेशिक अस्पताल सुर्खेतमै छ ।
सिआइबीले थप अनुसन्धान गर्दै, टोली आज सुर्खेत पुग्ने
पहिलो चरणको अनुसन्धान नेपाल प्रहरीले गरेकोमा थप अनुसन्धान केन्द्रीय अनुसन्धान ब्युरो (सिआइबी)ले गर्ने भएको छ । सुर्खेत प्रहरीले बुधबार उक्त घटनाको थप अनुसन्धानका लागि सिआइबीसँग सहयोग मागेको थियो । सिआइबीको टोली शुक्रबार बिहान सुर्खेत पुग्नेछ ।
