२१ फागुनको निर्वाचनका लागि झन्डै साढे दुई वर्ष कार्यकाल बाँकी छँदै स्थानीय तहका एक दर्जनभन्दा बढी जनप्रतिनिधिले राजीनामा दिए । जितेर केन्द्र सरकारको सांसद बन्ने इच्छासहित पालिका र प्रदेशको छँदाखाँदाको पद छाडेका उनीहरू अहिले यता न उताका भएका छन् ।
चुनाव जितौँला भन्ने सोचमा चुनावमा होमिएका अधिकांशले पराजय व्यहोरेका छन् । पद छाडेर चुनाव हारेपछि उनीहरू चिन्तामा छन् । यसपटकको निर्वाचनमा स्थानीय तह छाडेर संघीय सांसद बन्ने आससहित १७ बहालवाला जनप्रतिनिधिले उम्मेदवारी दिएका थिए । तर त्यसमध्ये तीनजना मात्रै सफल भए । १४ जनाले हार व्यहोर्नुप¥यो । काठमाडौं महानगरपालिकाका मेयर बालेन्द्र शाह बालेन, धरान उपमहानगरका मेयर हर्कराज राई र वीरगन्ज महानगरपालिकाका वडाध्यक्ष सुशील साह कानु मात्र विजयी भए । अन्य १४ उम्मेदवारको संघीय सांसद बन्ने सपना पूरा भएन ।
पालिका छाडेका जसले पराजय व्यहोरे
भरतपुर महानगरकी प्रमुख रेनु दाहाल पनि मेयर पद छाडेर चुनावमा होमिएका थिइन् । चितवन ३ बाट उम्मेदवार बनेकी उनले पराजय भोग्नुप¥यो । रास्वपाकी सोविता गौतमले ५९ हजार २७७ मतसहित चुनाव जित्दा दाहालले २० हजार ६१५ मत प्राप्त गरिन् ।
पदबाट राजीनामा दिएका बाँकेको नेपालगन्ज उपमहानगरका उपप्रमुख कमरुद्दिन राई पनि पराजित भए । उपेन्द्र यादवको जसपा नेपालबाट बाँके २ मा उम्मेदवारी दिएका उनी पराजित भए । उनको क्षेत्रमा एमालेका मोहम्मद इस्तियाक राई २४ हजार ६१६ मतसहित निर्वाचित भए ।
धुलिखेलको मेयरबाट राजीनामा दिएर चुनाव लडेका अशोक ब्याञ्जू श्रेष्ठ पनि पराजित भए । काभ्रे २ मा एमालेका उम्मेदवार श्रेष्ठलाई रास्वपाका उम्मेदवारले हराए । रास्वपाका बदन भण्डारीले ५३ हजार ३४४ मत ल्याउँदा श्रेष्ठले १३ हजार ९४० मात्र मत प्राप्त गरे ।
एमालेबाट मोरङ २ मा उम्मेदवारी दिएका रंगेलीका पूर्वमेयर दिलीप अग्रवाल पनि पराजित भए । उनलाई रास्वपाका कृष्णकुमार कार्कीले ४० हजार ९२४ मतसहित पराजित गरे । अग्रवालले १५ हजार ६२४ मत ल्याए । नेकपाका उम्मेदवार रहेका सूर्योदयका पूर्वमेयर रणबहादुर राई इलाम १ मा पराजित भए । उनले सात हजार ७७५ मत ल्याउँदा कांग्रेसका निश्कल राई १४ हजार ५४३ मतसहित विजयी भए ।
नागरिक उन्मुक्ति पार्टी छाडेर नेकपामा प्रवेश गरेर कैलाली १ बाट चुनाव लडेका टीकापुर नगरपालिकाका पूर्वमेयर रामलाल डगौरा थारूको सांसद बन्ने यात्रामा पनि पूर्णविराम लाग्यो । रास्वपाकी कोमल ज्ञवालीले १७ हजार ८१२ मत प्राप्त गरी विजयी भइन् । डगौरा आठ हजार ३९२ मतमा खुम्चिए ।
सोलुखुम्बुको थुलुङ दुधकोशी गाउँपालिकाको अध्यक्ष पद छाडेर नेकपाबाट प्रतिनिधिसभा संसद बन्न दौडिएका असीम राईले पनि पराजय भोग्नुपरेको छ । उनलाई पछि पार्दै कांग्रेसका प्रकाशसिंह कार्की विजयी भए । कार्कीले १३ हजार १६६ र राईले नौ हजार ४१४ मत ल्याए ।
उदयपुरको लिम्चुङबुङ गाउँपालिका अध्यक्ष पद छाडेर उदयपुर २ मा स्वतन्त्र उम्मेदवारी दिएका मेजरकुमार राई पनि पराजित भएका छन् । उनले ९० मत मात्र ल्याए । रास्वपाका सूर्यबहादुर तामाङ १४ हजार ८०२ मतसहित निर्वाचित भए ।
ओखलढुंगाको लिखु गाउँपालिकाकी उपाध्यक्ष अस्मिता थापा एमालेबाट उम्मेदवार बने पनि हार व्यहोर्नुप¥यो । उनले १० हजार ७२० मत ल्याउँदा रास्वपाका विश्वराज पोखरेल १३ हजार ९५३ मतसहित निर्वाचित भए ।
वीरगन्ज महानगरपालिका २० वडाध्यक्ष रामकिशोर सिंह पर्सा १ मा उज्यालो पार्टीबाट उम्मेदवार थिए । उनले ४१५ मत ल्याउँदा रास्वपाका बुद्धिबहादुर पन्त २७ हजार २७४ मतसहित निर्वाचित भए ।
धरान उपमहानगरपालिका १७ का वडाध्यक्ष सूर्यबहादुर भट्टराई नेकपाबाट सुनसरी १ मा पराजित भए । उनी उम्मेदवार रहेको सुनसरी १ बाट श्रम संस्कृति पार्टीका हर्कराज राई ३५ हजार ७४१ मत ल्याएर विजयी भए । भट्टराईले ६ हजार १८५ मत ल्याए ।
भजनी नगरपालिका– ३ का वडाध्यक्ष विक्रम चौधरी पनि सांसद बन्ने दौडमा थिए । तर, उनीहरूको संघीय संसद् पुग्ने यात्रा भने सफल हुन सकेन । चौधरीले ६ हजार ७४७ मत ल्याउँदा रास्वपाका जगतप्रसाद जोशी २० हजार ३५९ मतसहित निर्वाचित भए ।
दुईपटक स्याङ्जाको कालीगण्डकी गाउँपालिका अध्यक्ष बनेका खिमबहादुर थापाको पनि माननीय बन्ने यात्रामा पूर्णविराम लाग्यो । एमालेबाट स्याङ्जा २ मा उम्मेदवार बनेका उनले पनि हारे व्यहोरे । रास्वपाका झबिलाल डुम्रे २५ हजार ३५४ मतसहित निर्वाचित हुँदा थापा १४ हजार १०८ मतमा सीमित भए ।
पालिका छाडेर चुनाव लडेका जसले चुनाव जिते
स्थानीय तहको कार्यकाल छँदै छाडेर प्रतिनिधिसभा निर्वाचनमा होमिएका केही उम्मेदवार भने विजयी भएका छन् । काठमाडौं महानगरको मेयरबाट राजीनामा दिएर चुनाव लडेका बालेन्द्र शाह (बालेन) ६८ हजार ३४८ मतसहित निर्वाचित भए । उनले एमाले अध्यक्ष तथा चारपटक प्रधानमन्त्री भइसकेका केपी ओलीलाई भारी मतान्तरले पराजित गरे । धरान उपमहानगरका मेयर हर्क साम्पाङले पनि चुनाव जितेका छन् । पालिका छाडेर श्रम संस्कृति पार्टी खोलेका उनी धरान १ बाट ३५ हजार ७४१ मत ल्याएर प्रतिनिधिसभा सदस्य निर्वाचित भए । वडाध्यक्ष पद त्यागेर चुनावमा लडेका वीरगन्ज महानगर– १० का वडाध्यक्ष सुशीलकुमार साह पनि निर्वाचित भए । उनी ३० हजार ७४० मत ल्याएर पर्सा २ बाट प्रतिनिधिसभा सदस्यमा निर्वाचित भए ।
पूर्वप्रदेश सांसद : कसैको जमानत खोसियो, कसैको पद
प्रदेश सांसद छाडेर प्रतिनिधिसभा सांसद बन्ने दाउमा निर्वाचनमा होमिएका पूर्वसांसदमध्ये अधिकांशले हार व्यहोरेका छन् । अझ उम्मेदवारी दिएकामध्ये केहीको त जमानत नै जफत भएको छ । जमानत जफत हुनेमा मधेश प्रदेशका पूर्वमुख्यमन्त्री सतिशकुमार सिंह पनि छन् । न्यून मत ल्याएपछि उनको जमानत नै जफत भएको छ । स्वाभिमान पार्टीबाट उम्मेदवार बनेका उनले जम्मा तीन हजार ५५७ मत पाए । उनको क्षेत्र सप्तरी २ मा रास्वपाका रामजी यादव २८ हजार ४०४ मत ल्याई विजयी भएका छन् ।
बाँकेकी प्रदेश सांसद कृष्णा केसी पदबाट राजीनामा दिएर प्रतिनिधिसभा सदस्यमा उम्मेदवार बनेकी थिइन् । प्रगतिशील लोकतान्त्रिक पार्टीबाट उम्मेदवारी दिएकी उनले एक हजार २४० मत प्राप्त गर्दा रास्वपाका सुरेशकुमार चौधरी निर्वाचित भए ।
प्रतिनिधिसभा निर्वाचनमा पराजित भएका धर्मबहादुर चौधरी बर्दिया २ (२) मा सांसद थिए । नागरिक उन्मुक्ति पार्टीबाट सांसद भएका उनी पद छाडेर उज्यालो नेपाल पार्टीबाट बर्दिया २ मा उम्मेदवार बनेका थिए । तर जम्मा चार हजार ४७२ मत प्राप्त गरे भने रास्वपाका श्रीधर पोख्रेलले २९ हजार ६७८ मत ल्याएर जिते ।
नेकपाबाट महोत्तरी ४ बाट प्रतिनिसभा निर्वाचनमा उम्मेदवारी दिएका भरतप्रसाद साह पनि पराजित भएका छन् । पूर्वसांसद उनले पाँच हजार ३३६ मत ल्याउँदा रास्वपाकी गौरीकुमारीले ३० हजार मतसहित निर्वाचन जितिन् ।
मधेश प्रदेशकै पूर्वसभामुख रामचन्द्र मण्डलले पनि संघीय सांसद बन्ने दाउमा धनुषा १ बाट उम्मेदवारी दिएका थिए । नौ हजार ३१५ मत ल्याएका उनी रास्वपाका मातृका यादवबाट पराजित भए । यादव १० हजार ४०३ मत ल्याएर विजयी भए ।
प्रदेश सांसद त्यागेर राप्रपाबाट प्रतिनिधिसभा निर्वाचनमा उमेदवार बनेका राप्रपाका भक्तिप्रसाद सिटौला पनि पराजित भएका छन् । उनले दुई हजार ८० मत ल्याउँदा रास्वपाका शम्भुप्रसाद ढकाल ४३ हजार ६३१ मत ल्याएर निर्वाचित भएका छन् ।
बागमतीमा पाँचमध्ये तीनजना पराजित
प्रदेश सभा सदस्य पदबाट राजीनामा दिँदै प्रतिनिधिसभा निर्वाचनमा होमिएका बागमती प्रदेशका पाँच नेतामध्ये तीनजनाले लज्जास्पद हार व्यहोरेका छन् । प्रदेशको राजनीति छाडेर संघीय संसद् पुग्ने आकांक्षासहित मैदानमा उत्रिएका उनीहरू मतदाताबाट अपेक्षित समर्थन जुटाउन असफल हुँदा संघीय यात्रामा ‘ब्रेक’ लागेको छ । दुईजनाको जमानत नै जफत भएको छ । प्रतिनिधिसभा सदस्य निर्वाचन, २०८२ का लागि गत ५ माघमा कांग्रेसका कुन्दनराज काफ्ले, एमालेका प्रकाश श्रेष्ठ र अमनकुमार मास्के, नेकपाका वसन्त मानन्धर र युवराज दुलाल तथा राप्रपाका सुनील केसीले प्रदेश सभा सदस्य पदबाट राजीनामा दिएका थिए । तीमध्ये पाँचजनाले प्रतिनिधिसभा सदस्य निर्वाचनमा उम्मेदवारी दिएका थिए ।
उम्मेदवार बनेकामध्ये एमालेका दुई र नेकपाका एक उम्मेदवार पराजित भएका छन् । एमालेबाट काठमाडौं ६ का उम्मेदवार मास्के र काठमाडौं ७ का उम्मेदवार प्रकाश श्रेष्ठ तथा काठमाडौं ७ बाटै उम्मेदवार बनेका नेकपाका मानन्धर पराजित भएका हुन् । प्रकाश र वसन्तको जमानत नै जफत भएको छ ।
वसन्त र प्रकाशले कुल खसेको मतमा सदर मतको १० प्रतिशत मत पनि ल्याउन नसकेपछि उनीहरूको जनमान जफत भएको हो । काठमाडौं ७ मा कुल मतदाता संख्या ६८ हजार ६८५ रहेकोमा ४४ हजार ८५७ मत खसेको थियो । यो क्षेत्रमा ४४ हजार ०५२ मत सदर भएको थियो भने ८०५ मत बदर भएको छ । उम्मेदवारले जमानत जोगाउन कुल सदर मतमध्ये १० प्रतिशत ल्याउनै पर्ने व्यवस्था भए पनि नेकपाका मानन्धर र एमालेका श्रेष्ठले क्रमशः तीन हजार ६६७ र तीन हजार ५४४ मत मात्रै प्राप्त गरेका छन् । यो क्षेत्रमा राष्ट्रिय स्वतन्त्र पार्टीका गणेश पराजुली २७ हजार ८०५ मत प्राप्त गर्दै विजयी भए ।
दुलाल र केसी संघीय सांसद बन्न सफल
बागमती प्रदेश सभा सदस्यबाट राजीनामा दिएर प्रतिनिधिसभा सदस्यमा उम्मेदवार बनेका सुनील केसी र युवराज दुलाल भने निर्वाचित भएका छन् । राप्रपाबाट प्रदेश सांसद रहेका केसी राजीनामा दिएर रास्वपाबाट काठमाडौं २ मा उम्मेदवार बनेका थिए । उनी यस क्षेत्रबाट अत्यधिक मतसहित निर्वाचित भएका छन् । केसीले ३४ हजार २३८ मत प्राप्त गर्दै संघीय संसद्को यात्रा तय गरेका छन् । नेकपाबाट प्रतिनिधिसभा सदस्य उम्मेदवार बनेका दुलाल पनि निर्वाचित भएका छन् । उनी सिन्धुपाल्चोक २ बाट उम्मेदवार बनेका थिए । उनले संघीय संसद्को यात्राका क्रममा २१ हजार ६९९ मत प्राप्त गर्दै जित निकालेका हुन् । प्रतिनिधिसभा सदस्यको उम्मेदवार बन्ने चाहनाका साथ प्रदेश सदस्यबाट राजीनामा दिएका कांग्रेसका कुन्दनराज काफ्लेले भने टिकट नपाएपछि उनको संघीय संसद्को यात्रा भने यसअघि नै टुंगिसकेको थियो ।
मधेश प्रदेश सांसद त्यागेर प्रतिनिधिसभा सदस्यमा उम्मेदवारी दिएका रहबर अन्सारी निर्वाचित भएका छन् । तत्कालीन माओवादीबाट मधेश प्रदेश सांसद बनेका उनी रास्वपाबाट प्रतिनिधिसभा उम्मेदवार बनेका थिए । उनले ४१ हजार २०० मतसहित जित हात पारे ।
लुम्बिनीका एक सांसद प्रतिनिधिसभातिर
लुम्बिनीका पूर्वप्रदेश सभा सदस्य कन्हैया बानियाँ रुपन्देही ४ (१) बाट निर्वाचित भएका थिए । प्रदेश सांसद पद छाडेर उम्मेदवार बनेका उनी रास्वपामा प्रवेश गर्दै उम्मेदवार दिएका थिए । उनी २८ हजार ६६ मतसहित निर्वाचित भए ।
