सामान्य अवस्थाको तुलनामा आज मंगलबार आयल निगमको बागमती प्रादेशिक कार्यालय, थानकोट डिपोले तीन गुणा बढी पेट्रोल वितरण गर्दै छ, तैपनि दिउँसो १२ बजेदेखि नै पेट्रोल पम्पमा उपभोक्ताको लाइन बाक्लिएको छ ।
अरू वेला काठमाडौं उपत्यकामा दैनिक औसत ६ लाख लिटर पेट्रोल खपत हुने गरेको छ । आज भने थानकोट डिपोले १६ लाख ७५ हजार लिटर पेट्रोल माग भएकाले सोहीअनुसार वितरण गर्न थालेको थानकोट डिपो प्रमुख जगदीश यादवले जानकारी दिए । ‘बिहानै डिपो खोलेर पेट्रोल, डिजेल वितरण थालेका छौँ । आज १६ लाख ७५ हजार लिटर पेट्रोलको माग छ,’ उनले भने, ‘त्यसमध्ये दिउँसो एक बजेसम्म ६ लाख लिटर पेट्रोल डिपोबाट चलानी भइसक्यो । साँझसम्म माग भएअनुसार सबै इन्धन वितरण हुन्छ ।’
त्यस्तै, डिजेल पनि एक लाख ९४ हजार लिटर बिक्री गर्न लागेको उनले जानकारी दिए । अरू वेला डिजेलको दैनिक औसत खपत सात लाख लिटर हो । चुनावी चहलपहल र उपत्यकाबाट बाहिरिने सवारीसाधनको कारण खपत बढेको डिपो प्रमुख यादवको बुझाइ छ । उनले पनि दिउँसो १२ बजेपछि पेट्रोल पम्पमा लाइन बढ्न थालेको रिपाेर्टिङ प्राप्त भएको बताए ।
‘काठमाडौंबाट कुलेखानी हुँदै बाहिरिने नाका क्षेत्रका पम्पमा लाइन लागेको जानकारी प्राप्त भएको छ । त्यस्तै, बिपी र अरनिको राजमार्ग हुँदै बाहिरिने भक्तपुर र बनेपाका पम्पमा पनि उपभोक्ताको लाइन रहेको जानकारी प्राप्त भएको छ,’ उनले भने । काठमाडौंको साझा सहकारी, आर्मी र प्रहरीका पम्पमा समेत लाइन बाक्लिएको छ ।
मंगलबार दिउँसो १ बजे भद्रकालीस्थित आर्मीको रिपुमर्दिनी पेट्रोल स्टेसनमा सवारीसाधनको लाइन बाक्लिएपछि सडक खुलाउन ट्राफिक प्रहरी नै खटिएका छन् । ड्युटीमा खटिएका ती ट्राफिक प्रहरीले दिउँसो १२ बजेदेखि लाइन सुरु भएर बाक्लिएको जानकारी दिए । ललितपुरको पुल्चोकस्थित साझा सहकारीबाट सञ्चालित पेट्रोल पम्पमा पनि एक सय मिटरभन्दा टाढासम्म कार, मोटरसाइकलको लाइन लागिसकेको छ । आयल निगमले मागअनुसार इन्धन वितरण भइरहेकाले नअत्तालिन उपभोक्तालाई आग्रह गरिरहेको छ ।
निगमले आइतबार पनि उपत्यकामा १६ लाख ५० हजार र सोमबार १३ लाख ३९ हजार लिटर वितरण गरेको जनाएको छ । जुन सामान्य अवस्थाको मागको तुलनामा दोब्बर बढी हो ।
