एनभिए भलिबल च्याम्पियनसिपअन्तर्गत विभागीय टोली नेपाल एपिएफ क्लबलाई ३–१ को सेटमा हराउँदै रुकुम पश्चिम भलिबल प्रशिक्षण केन्द्रले पुरुषतर्फ सेमिफाइनल स्थान गरेको छ । पाकिस्तानी खेलाडीको साथ पाएको रुकुम पश्चिम बिहीबार भएको खेलमा पहिलो सेटमा पछि परेको थियो । त्यसपछि उत्कृष्ट पुनरागमन गर्दै बलियो एपिएफलाई निराश बनाउँदै रुकुम पश्चिमले अन्तिम चारको स्थान पक्का गरेको हो । रुकुम पश्चिम २२–२५, २५–२०, २५–१६ र २५–२० ले विजयी भयो । एपिएफले पहिलो सेटपछि गतिलो प्रदर्शन गर्न सकेन ।
पुरुषतर्फ नेपाल पुलिस क्लब पनि अन्तिम चारमा पुगेको छ । कोशी प्रदेश भलिबल संघलाई ३–० को सेटमा हराउँदै पुलिस अन्तिम चारमा पुगेको हो । कोशीविरुद्ध पुलिस २५–१९, २५–१७ र २५–१८ को सेटमा विजयी भयो । फाइनल प्रवेशको खेलमा पुलिसले साबिक विजेता हेल्प नेपाल स्पोर्टस् क्लबको सामना गर्नेछ । पुरुषतर्फको पहिलो क्वार्टरफाइनलमा हेल्प नेपालले बुढानीलकण्ठ भलिबल क्लबलाई ३–० को सोझो सेटमा हराउँदै सेमिफाइनलमा स्थान सुरक्षित गरेको थियो । तीनवटै सेटमा हेल्प नेपालले उत्कृष्ट प्रदर्शन ग¥यो ।
सेमिफाइनल समीकरण पूरा
दोस्रो सेटमा बुढानीलकण्ठले हेल्प नेपाललाई चुनौती दिएको थियो । तर, आफ्नै गल्तीका कारण बुढानीलकण्ठले हेल्प नेपाललाई दोस्रो सेटमा पाखा लगाउन सकेन । यसैगरी, पुरुषतर्फ त्रिभुवन आर्मीले पनि अन्तिम चारमा स्थान पक्का गरेको छ । आर्मीले खिल्जी युवा क्लबलाई ३–० को सोझो सेटमा हराउँदै सेमिफाइनलमा स्थान सुरक्षित गरेको हो ।
राष्ट्रिय खेलकुद परिषद् (राखेप) कभर्ड हलमा पुरुषतर्फका अन्तिम क्वार्टरफाइनलमा आर्मीले खिल्जीलाई २५–१८, २५–१७ र २५–१५ ले निराश बनायो । यस नतिजासँगै सेमिफाइनल समीकरण पूरा भएको छ । प्रतियोगिताको पुरुषतर्फको पहिलो क्वार्टरफाइनल खेल शुक्रबार हेल्प नेपाल र नेपाल पुलिसबिच हुनेछ । आर्मीले रुकुम पश्चिमविरुद्ध फाइनल प्रतिस्पर्धाका लागि खेल्नेछ ।
