साबिक विजेता लुम्बिनी लायन्सले तेस्रो नेपाल प्रिमियर लिग (एनपिएल)को उद्घाटन खेलमा च्याम्पियन शैलीमा सानदार जित निकालेको छ । दीपेन्द्रसिंह ऐरीको कप्तानीमा रहेको सुदूरपश्चिमविरुद्ध लुम्बिनीले सोमबार सात विकेटको जित निकालेको हो । लुम्बिनीले गत वर्षको फाइनलमा सुदूरपश्चिमलाई ६ विकेटले हराउँदै उपाधि जितेको थियो ।
कीर्तिपुरस्थित त्रिवि क्रिकेट मैदानमा लुम्बिनीका कप्तान रोहितकुमार पोडेलले टस जितेर बलिङ गर्ने निर्णय सही देखिए । लुम्बिनीका सिमर बलर हाबी भएपछि पहिलो ब्याटिङ गरेको सुदूरपश्चिमले १७.२ मा अल आउट हुँदा स्कोर बोर्डमा केवल ८७ रन मात्र जोड्यो । प्रत्युत्तरमा लुम्बिनीले ९.५ ओभरमै तीन विकेटको क्षतिमा ८८ रन बनायो । लुम्बिनीलाई सहज जित दिलाउने क्रममा अस्ट्रेलियाका डार्सी सर्टले १८ बलमा चार चौका र तीन छक्का प्रहार गरी ४० रनको योगदान दिए ।
दोस्रा ओपनर आसिफ शेखले २५ बल खेलेर समान दुई चौका र छक्का प्रहार गरी ३२ रन बनाए । दुवैले पहिलो विकेटका लागि ६.२ ओभरमा ७१ रनको साझेदारी गरेका थिए । कप्तान रोहितले विजयी चौका प्रहार गरे । उनले तीन बलमा पाँच रन बनाए । लुम्बिनीले खेल सकिनु ६१ बलअघि जित निकाल्यो ।
यसपटक शेख जनकपुरबाट लुम्बिनी पुगेका हुन् । लुम्बिनीविरुद्ध सुदूरपश्चिमका अनिल खरेलले दुई तथा कप्तान दीपेन्द्रले एक विकेट लिएका थिए ।
सुदूरपश्चिमको ब्याटिङ चलेन
पहिलो इनिङ्समा सुदूरपश्चिमका लागि कप्तान दीपेन्द्रसिंहबाहेक अन्य खेलाडीले ठुलो स्कोर बनाउन सकेनन् । दीपेन्द्रले २३ बलमा चार चौकासहित सर्वाधिक २७ रन बनाए । उनलाई किशोर महतोले १२.३ ओभरमा बोल्ड गरे । त्यसवेला सुदूरपश्चिमले आठ विकेट गुमाउँदा मात्र ७० रन बनाएको थियो । ओपनर सैफ जैबले १३ रन बनाए । उनले १४ बलमा दुई चाैका हिर्काएका थिए । ओपनर विनोद भण्डारी ९, आरिफ शेख डकआउट भए । ब्रान्डन म्याकमुलेन २, ईशान पाण्डे ७ तथा वेस्ट इन्डिजका ब्याट्सम्यान सेरफन रुथरफोर्ड १ रनमा पेभेलियन फर्के ।
स्कट कुगेलेइन पनि डकआउट हुँदा सुदूरपश्चिमले ९.५ ओभरमा ७ विकेट गुमाउँदा ५७ रन बनायो । १०औँ ओभरमा स्पिनर शेर मल्लले दुई विकेट लिएपछि लुम्बिनी खेलमा हाबी भएको थियो । किशोरले पनि १३ ओभरमा लगातार दुई विकेट लिएपछि सुदूरपश्चिम सानो स्कोरमै खुम्चिन बाध्य भयो ।
लुम्बिनीका लागि किशोर महतोले सर्वाधिक ४ विकेट लिएका थिए । उनले २२ रन खर्चिए । यसबाहेक शेर मल्लले चार ओभरमा ११ रन दिएर तीन विकेट हात पारे । साड्ली भान, रोहितकुमार पौडेल र तिलक भण्डारीले समान एक विकेट लिएका थिए ।
मंगलबारको टिकट सोल्ड आउट
एनपिएलअन्तर्गत मंगलबार दुई खेल हुनेछन् । खेल सुरु हुनु एक दिनअघि नै टिकट सोल्ड आउट भएको आयोजक नेपाल क्रिकेट संघ (क्यान)ले जनाएको छ । पहिलो खेल १२:३० बजे विराटनगर किंग्स र चितवन राइनोजबिच हुनेछ । साँझ ५ बजे कर्णाली याक्सले जनकपुर बोल्ट्सको सामना गर्नेछ । यसअघि उद्घाटन दिनको टिकट तीन दिनअघि नै सोल्ड आउट भएको थियो ।
