दोस्रो नेपाल प्रिमियर लिग (एनपिएल)को विजेता लुम्बिनी लायन्सले च्याम्पियन्स ट्रफी सेलिब्रेसन कन्सर्ट आयोजना गर्ने भएको छ । लुम्बिनी प्रदेशमा च्याम्पियनसिप ट्रफी सेलिब्रेसन टुरमा रहेको लुम्बिनीले सेलिब्रेसन टुरको अन्तिम दिन १६ पुसमा भव्य कन्सर्ट गर्ने घोषणा गरेको हो । कन्सर्ट बुटवलस्थित बुटवल अन्तर्राष्ट्रिय कन्भेन्सन सेन्टरमा हुनेछ ।
च्याम्पियन्स ट्रफी सेलिब्रेसन टुरअन्तर्गत लुम्बिनी प्रदेशका प्रत्येक जिल्लाका महत्वपूर्ण स्थान, ऐतिहासिक, सांस्कृतिक र प्राकृतिक धरोहरहरूको भ्रमण भइरहेको छ । लुम्बिनी लायन्सका अध्यक्ष ईश्वर जिसीले खेलाडीको मिहिनेत र समर्थकहरूको निरन्तर साथमा टोलीले उपाधि जितेको बताए ।
‘एनपिएलको सफलतामा आउनुहोस्, हामी सबै मिलेर यो विजय उत्सव भव्य तरिकाले मनाऔँ र यसलाई अझ गर्विलो क्षण बनाऔँ,’ जिसीले भने । च्याम्पियन्स ट्रफी सेलिब्रेसन टुर ५ पुसबाट बाँके र बर्दियाबाट सुरु भएको थियो । लुम्बिनी लायन्सले गत २७ मंसिरमा सुदूरपश्चिम रोयल्सलाई ६ विकेटले हराउँदै उपाधि जितेको थियो ।
