सिराहाको मिर्चैया नगरपालिका–८, मझौवागाउँमा निर्माणाधीन घरको सेफ्टी ट्यांकीको सेटरिङ खोल्ने क्रममा बेहोस भएका कामदारको उद्धार गर्न पुगेका दुई युवक पनि बेहोस भएका छन् ।
स्थानीय मिश्री रायको निर्माणाधीन घरको सेफ्टी ट्यांकीको सेटरिङ खोल्ने क्रममा बिहीबार अपरान्ह करीब ३ बजेतिर स्थानीय कामदार ३३ वर्षीय राकेश राय बेहोस भएका थिए । इलाका प्रहरी कार्यालय मिर्चैयाका अनुसार उनको उद्धार गर्न ट्यांकीभित्र पसेका दिपन राय र मिथलेश्वर राय पनि बेहोस भएका हुन् ।
ट्यांकीभित्र बेहोस भएका तीनैजनालाई स्थानीयले तत्काल उद्धार गरी उपचारका लागि मिर्चैया–७ स्थित मनकामना अस्पताल ल्याएका थिए । उद्धारका कारण मानवीय क्षति हुनबाट जोगिएको प्रहरीले जनाएको छ ।
अस्पतालमा उपचार गराइरहेका राकेश र दिपनको अवस्था खतरामुक्त रहेको प्रहरीले जनाएको छ । प्रहरीका अनुसार मिथलेश्वर भने उपचारपछि साँझ घर फर्किसकेका छन् । स्थानीयले निर्माणाधीन ट्यांकीमा अक्सिजन अभाव र विषाक्त ग्यासको मात्रा बढी भएकाले घटना भएको हुन सक्ने अनुमान गरेका छन् ।
