खेलको अन्तिम इन्जुरी समयमा अनन्त तामाङको उत्कृष्ट गोलको सहयोगमा नेपाली राष्ट्रिय पुरुष फुटबल टोली बिहीबार बंगलादेशलाई मैत्रीपूर्ण फुटबल प्रतियोगितामा २–२ को बराबरीमा रोक्न सफल भएको छ । फिफाको मान्यताप्राप्त एक मात्र मैत्रीपूर्ण खेलको निर्धारित समयसम्म नेपाल २–१ ले पछाडि थियो । ढाकास्थित ढाका नेसनल रंगशालामा हारतर्फ उन्मुख भइरहेको नेपालका लागि अनन्तले उत्कृष्ट कर्नर किकमा गोल गर्दै बंगलादेशलाई २–२ को बराबरी रोकेका हुन् ।
बंगलादेशको घरेलु मैदानमा नेपालले खेलको २९औँ मिनेटमा १–० को अग्रता लिएको थियो । नेपालका अनुभवी खेलाडी रोहित चन्दले डिबक्सबाहिरबाट सशक्त प्रहार गर्दै नेपाललाई अग्रता दिलाए । उनको करिअरको यो दोस्रो अन्तर्राष्ट्रिय गोल हो । खेलको पहिलो हाफमा अग्रता लिएको नेपाल दोस्रो हाफको सुरुवातमै २–१ ले पछि पर्यो ।
खेलको ४६औँ मिनेटमा बंगलादेशका स्टार खेलाडी हम्जा चौधरीले एक्रोब्याटिकमा गोल गर्दै बंगलादेशलाई १–१ को बराबरीमा ल्याए । खेलको ४९औँ मिनेटमा हम्जाले पेनाल्टीमा गोल गर्दा बंगलादेश २–१ को स्थितिमा पुग्यो । डिबक्सभित्र नेपालका खेलाडीले बंगलादेशी खेलाडीलाई फल गरेपछि प्राप्त पेनाल्टीमा हम्जाले नेपालका गोलरक्षक तथा कप्तान किरण चेम्जोङलाई विपरीत दिशामा डाइभ गराउँदै गोल गरेका हुन् ।
टोली जित्ने लगभग निश्चित भइसकेपछि बंगलादेशका मुख्य स्ट्राइकर हम्जाले अन्तिम समयमा मैदान छाडेका थिए । नेपाल र बंगलादेशले एएफसी एसियन कप छनोटको तयारीका लागि मैत्रीपूर्ण खेल खेलेका हुन् । नेपालले अब १८ नोभेम्बरमा मलेसियासँग एसियन कप छनोटको खेल खेल्दै छ । एसियन कपको छनोट चरणबाट बाहिरिसकेको नेपालले आफ्नो समूहमा जित निकाल्न सकेको छैन । नेपालले मलेसिया, लाओस र भियतनामसँग यसअघिका खेल गुमाएको थियो ।
