राष्ट्रिय मानव अधिकार आयोगले काठमाडौं उपत्यकामा शान्तिसुरक्षाको व्यवस्था मिलाउन सरकारलाई निर्देशन दिएको छ।
बिहीबार प्रेस वक्तव्य जारी गर्दै आयोगका प्रवक्ता डा. टीकाराम पोखरेलले समाजवादी मोर्चा र राजतन्त्र समर्थकको शक्ति प्रदर्शनलाई लक्षित गरी सुरक्षा व्यवस्था गर्न भनेका हुन्।
प्रदर्शनलाई शान्तिपूर्ण बनाउन आग्रह गर्दै वक्तव्यमा भनिएको छ, ‘आफ्नो विचार र अभिव्यक्तिको स्वतन्त्रताको अधिकारको प्रयोग गर्दा देशको संविधान र राष्ट्रिय तथा अन्तर्राष्ट्रिय कानुनमा उल्लेखित प्रावधानहरूको पालनामा संवेदनशील हुँदै अरूको अधिकारमा बाधा पर्नेतर्फ सचेत रहन र आफ्ना प्रदर्शनका कार्यलाई शान्तिपूर्ण बनाउन आयोग प्रदर्शनरत पक्षलाई अपिल गर्दछ।’
यस विषयमा आयोगले काठमाडौं र ललितपुरका प्रमुख जिल्ला अधिकारी, जिल्ला प्रहरी प्रमुख र नेपाल प्रहरीको मानव अधिकार सेलका प्रतिनिधिसँग छलफलसमेत गरेको छ।
शान्तिसुरक्षाको व्यवस्था मिलाउँदा मानव अधिकारप्रति संवेदनशील हुन पनि आयोगले सरकारलाई आग्रह गरेको छ।
