नेपालगन्ज नाका लागुऔषध ओसारपसारको ‘ट्रान्जिट प्वाइन्ट’ बन्दै गएको छ । लागुऔषध ओसारपसार र प्रयोगकर्ताको संख्यासँगै पक्राउ पर्नेको संख्या बढेपछि नेपालगन्ज नाका ‘ट्रान्जिट प्वाइन्ट’ बन्दै गएको पुष्टि भएको हो ।
लागुऔषध ओसारपसारको प्रमुख गन्तव्य नेपालगन्ज बन्न थालेपछि प्रहरीले पहिलो प्राथमिकतामा लागुऔषध नियन्त्रणलाई बनाएको बाँके प्रहरी प्रमुख तुलबहादुर कार्कीले बताए । उनले हरेक दुई दिनमा एक–दुईजना लागुऔषध ओसारपसार तथा कारोबारी पक्राउ पर्ने गरेको जानकारी दिए । पछिल्लो १५ दिनमा १० जना लागुऔषध ओसारपसार तथा प्रयोगकर्ता पक्राउ परेको र सातजनाविरुद्ध मुद्दा दायर गरिएको बताए । ‘पछिल्लो १५ दिनमा १० जना लागुऔषध ओसारपसार तथा प्रयोगकर्तालाई पक्राउ गरिएकोमा सातजनाविरुद्ध मुद्दा दर्ता गरिएको छ,’ उनले भने ।
कार्कीले १५ दिनमा एक किलो एक सय ग्राम ब्राउनसुगर, चार किलो २२० ग्राम चरेस र पाँच हजार ट्याब्लेट ट्रामाडोल ट्याब्लेट बरामद गरेको बताए । ‘अपराध नियन्त्रणअन्तर्गत बाँके प्रहरीको पहिलो प्राथमिकतामा लागुऔषध नियन्त्रण रहेको छ,’ एसपी कार्कीले भने, ‘नेपालगन्ज लागुऔषधको ट्रान्जिट प्वाइन्ट बन्न थालेपछि प्रहरीले नियन्त्रण गर्न अभियान थालेको हो । यो अभियान जारी रहनेछ ।’
लागुऔषध ओसारपसार गर्ने भरियालाई मात्र नभई मुख्य कारोवारीलाई पक्राउ गर्ने योजनाका साथ प्रहरी अगाडि बढेको उनको भनाइ छ । उनले लागुऔषध नियन्त्रणका लागि बाँकेको प्रमुख नाका जमुनाहा र अन्य सहायक नाकामा कडाइ गरिएको पनि बताए । ‘नाकामा प्रहरी परिचालन गरिएको छ, सुराकीका लागि लागुऔषध प्रयोगकर्तालाई समेत परिचालन गरिएको छ,’ कार्कीले भने । उनले जिल्ला प्रहरी कार्यालयमा सबैभन्दा धेरै लागुऔषध मुद्दाका थुनुवा पनि भएको बताए । लागुऔषध मुद्दाका थुनुवाका कारण जिल्ला प्रहरी कार्यालयको थुनुवा कोठा भरिएको छ । ‘लागुऔषधका थुनुवा दिनप्रतिदिन थपिँदै गएपछि राख्ने ठाउँसमेत अभाव भएको छ,’ उनले भने ।
